د طالبانو د کډوالو وزیر په ځانمرګي حمله کې ووژل شو

د کډوالو او د ستنېدونکو افغانانو د چارو دپاره د طالبانو وزیر خلیل الرحمان حقاني د شورو، چهارشنبې، په ورځ په کابل کې په ځانمرګي حمله کې ووژل شو.

د طالبانو د حکومت یو چارواکي د نوم نه څرګندولو په شرط ای اېف پي خبري ادارې ته وویل چاودنه د مهاجرینو او د ستنېدونکو چارو د وزارت دننه وشوه.

د چاودنې د نوعیت په اړه چارواکي وویل دا ځانمرګي حمله وه.

خلیل الرحمان حقاني د حقاني ډلې د باني جلال الدین حقاني ورور او د طالبانو د کورنیو چارو وزیر سراج الدین حقاني تره و.

ای اېف پي خبري اداره وايي د افغان حکومت خلاف د طالبانو په ۲۰ کلنه جګړه کې حقاني نېټ ورک یا حقاني ډله د ټولو نه زیاتو خونړیو حملو ذمه واره بلل کېده.

ای اېف پي خبري اداره وايي د طالبانو په تحریک کې دننه حقانیان د طالبانو د کندهار د مشرانو سره د اثر او رسوخ په کوښښونو کې ښکېل دي، حقانیان د حقیقت پسندو او د عملي نظریاتو پلویان دي او د اثر او رسوخ دپاره يې مقابله د طالبانو د هغه ډلې سره ده چې سخت نظریات لري.

په دې اړه په سمدستي ډول څه نه دي وېل شوي چې ایا په کابل کې د تازه حملې ذمه واري چا منلې او که نا؟

په کال ۲۰۲۱ کې په افغانستان طالبانو د بیا واکمنېدو راهسې داعش خراسان وسله والې ډلې په کابل او د افغانستان په ځینو نورو برخو کې د حملو ذمه واري منلې ده. په حملو کې د طالبانو ګڼ شمېر چارواکي هم وژل شوي دي.

د وي او ای اشنا څانګه وايي خلیل الرحمان حقاني د طالبانو تر ټولو لوړپوری چارواکی دی چې طالبانو د بیا واکمنېدو وروسته په یوه چاودنه کې وژل شوی دی. په تېرو څه باندې دریو کلنو کې د طالبانو د بلخ ولایت د والي په ګډون د طالبانو یو شمېر لوړ پوړي چارواکي په امنیتي پیښو کې وژل شوي دي.

د امریکا د بهرنیو چارو وزارت د عدالت لپاره د انعام پروګرام د ۲۰۱۱ کال په فبرورۍ کې خلیل الرحمن حقاني د نړیوال ترهګر په توګه وپېژند او د هغه پر سر یې تر پنځو میلیونو ډالرو پورې انعام ټاکلی و.