نوښار: د کولې درنګ کې د چاودنې له امله درې مزدوران مړه شوي

د خېبر پښتونخوا په نوښار ضلع کې د سکرو په یو کان کې د چاودنې له امله د کولې درې مزدوران وژل شوي دي.

د ډان نیوز له مخې دا پېښه تېره ورځ د نوښار په دروازګۍ سیمه کې شوې ده اؤ وایي په پېښه کې د وژل شوؤ مزدورانو تعلق د شانګلې سیمې سره دی.

رپورټ کې ویل شوي چې دغلته مزدورانو د سکرو کان یا درنګ کې کار کولو چې په دغه مهال د ګیس چاودنه شوې اؤ درې کسان د سکرو په درنګ کې بند پاتې شوي چې وروسته مرستندویه فعالینو د هغوي مړي راویستي دي.

د پاکستان سنټرل ماينز لېبر فېډريشن رپورټ دی چې په ټول پاکستان کې روان کال په جلا جلا پېښو کې د کولې د درنګونو 111 تنه مزدوران مړه شوي دي.

په دغو کې په سيند صوبه کې پينځه، په پنجاب کې 10، په پښتونخوا کې 29 او د تېرو کلو په څېر تر ټولو زيات په بلوچستان کې 67 د کولې مزدوران مړه شوي دي، چې زياتره د سوات او شانګلې دي.

د پاکستان سېنټرل ماينز لېبر فېډريشن صدر لالا سلطان د کولې په کانونو کې د مرګونو د پېښو ذمه واري پر حکومت او اړوند ادارو اچوي.

ډیوه سره خبرو کې هغه وایي، د کارګرو خوارانو پر مخ او سر باندې يو څادر او ګونۍ [بوجۍ] واچوي چې که په کان کې دننه چاودنه کېږي او دوی پکې مري نو د دوی شناخت به بيا په اسانه کېږي:

د سوات او په خاصه د شانګلې خلک له حکومته د کار او دوی ته پر کلي وطن د روزګار نه برابرولو ګیلې کوي.