واشنګټن: تمه ده د نړۍ د تېلو د تولیدونکو هېوادونو مشران به نن د زیارت یا پنجشنبې په ورځ د ویانا په غونډه کې د تېلو د تولید په کمولو باندې موافقه وکړي.
د اومه یا خامو تېلو بیه د تېرو دوو میاشتو په اوږدو کې په مارکېټ کې د زیاتو تېلو له امله ۲۰ فیصده کم شوی وو.
د امریکا ولسمشر ډانلډ ټرمپ د تېلو د بیې د زیاتوالي پرضد خبرداری ورکړی خو څېړونکي وايي، د وینا په غونډه کې ښايي د اوپیک او روسیې لخوا د تېلو د کم تولیدولو پرېکړه وشي چې له امله به یې د تېلو بیې بېرته لوړې شي.
د عمان د تېلو وزیر د شورو یا چهارشنبې په ورځ ویانا ته له رسېدو سره سم خبریالانو ته وویل، د تېلو تولیدونکي مشران ددې لپاره په ویانا کې سره راټولېږي چې د تېلو د تولید د کمولو پرېکړه وکړي.
محمد بن حمد الرومي وویل:
"هغه څه چې مونږ ورته اړتیا لرو هغه یوه مناسبه بیه ده او د یو بېرل تېلو لپاره پنځوس ډالره بیه مناسبه نه ده. "
د تېلو بیې له اکټوبر راهیسې وروسته له هاغې راپرېوتې کله چې سعودي عربستان د تېلو تولید ددې لپاره زیات کړ چې د ایراني تېلو د صادراتو د کمېدو تشه ډکه کړي.
امریکا په ایران بندیزونه ولګول، خو د تېلو ځینې اخېستونکي یې له ایران څخه د تېلو نه اخېستلو له دغه بندیز څخه معاف کړل.
سعودي عربستان چې د تېلو د صادرونکو هېوادونو یا اوپېک ريښتینی مشر دی غواړي چې د تېلو تولید کم شي تر څو په نړیوال مارکېټ کې په راتلونکي کال تېل له حده زیات نشي.
روسیه که څه هم د اوپېک غړیتوب نه لري خو ورته دریځ لري.
سعودي عربستان د ټرمپ د فشار لاندې دی څوک چې وايي، د تېلو د بیو زیاتوالی به ستونزې وزېږوي.
په ابو ظبي کې د نومبر په ۱۱ نېټه د نړۍ د تېلو چارواکو وویل، دوی چمتو دي چې د تېلو تولید کم کړي.
په ارجنټاین کې د شلو پرمخ تللیو هېوادونو په غونډه کې د روسیې ولسمشر ویلادیمیر پوتین دا ومنله چې د تېلو د تولیدونکو هېوادونو ترمنځ په دې مسله باندې ټول په یوه نظر دي.
د امریکا قوانین دې ته اجازه نه ورکوي چې د تېلو تولید دې ددې لپاره کم شي چې بیې پرې زیاتې شي ځکه ددغه هېواد د تېلو د تولید صنعت سره پاشلی دی.
د امریکا د تېلو تولید په دې وروستیو کلونو کې زیات شوی او له پرمختللې ټکنالوژۍ څخه مننه چې دا زیاتوالی به د ۲۰۱۹ کال پرمهال هم دوام ولري.
په دې وروستیو کلونو کې روسیه، سعودي عربستان او امریکا په نړۍ کې تر ټولو زیات اومه تېل تولیدوي.