واشنګټن: د بخښنې نړیوالې ادارې یا امنیسټې انټرنېشنل د پاکستان له حکومت څخه غوښتي دي چې ژر تر ژره دې، د یکشنبې يا اتوار په ورځ د پي ټي ام د دریو فعالانو د وژل کېدو په اړه خپلواکه او اغیزناکه پلټنې وکړي.
د بخښنې په نړیوالې اداره کې د جنوبي اسیا څېړونکې رابعه محمود وايي:
(که چېرې دا راپورونه سم وي چې پوځ لاریون کونکي په خپلو ډزو وژلي دي نو دا به له نړیوال قانون څخه یو جدي سرغړونه وي.)
هغې وړاندې ویلي، د نړیوال قانون له مخې د امنیتي ځواکونو لخوا وسلې باید یواځې هغه وخت وکارول شي کله چې پرې د خلکو ژوند ژغورل کېږي او کله چې وژونکې وسلې وکارول شي نو د هرې پېښې په اړه باید بشپړې پلټنې وشي.
رابعې دا هم وویل، کچېرې دا وموندل شي چې وسلې د غیر قانوني وژنو لپاره کارول شوي دي نو ښکېل کسان باید محکمې ازادو محکمو ته راکاږل شي.
د پښتون ژغورنې غورځنګ یا پي ټي ام دوه غړي چې د پاکستان د قامي اسامبلۍ غړي هم دي د شمالي وزیرستان په خړ کمر سیمه کې یې له خلکو سره لاریون کاوه چې پرې ناتاره ډزې وشوې او مرګ ژوبله پکې رامنځ ته شوه.
د بخښنې نړیواله اداره وايي، چې علي وزیر دا مهال د پاکستان پوځ له ځانه سره وړی.
د پاکستان پوځ ویلي وه، چې پېښه هغه وخت رامنځ ته شوه کله چې د پي ټي ام فعالانو په یو چک پوست باندې برید وکړ خو د پي ټي ام کسان وايي، چې د دوی لخوا هېڅ ډول برید نه دی شوی او د محسن داوړ په وینا د پاکستان پوځ تل داسې درواغ وايي.
له پېښې وروسته په سیمه کې د ټیلیفون او انټرنیټ خدمات تړل شوي دي او له همدې امله د پېښې په اړه لا زیات معلومات نه دې روښانه شوي.