اسلام اباد د افغان کډوالو په پاکستان کې پاتې کېدو موده نوره يو کال غځولې

د پاکستان حکومت رجسټرډ او کارډ لرونکو افغان کډوالو ته په ملک کې د پاتې کېدو موده تر يو کال پورې غځولې ده.

د ملګرو ملتونو د کډوالو ادارې (يو اېن اېچ سي ار) ترمخه دا وخت په پاکستان کې رجسټرډ کډوال د ۱۴ لاکه پورې دي او راپورونه وايي د دې ترڅنګ نزدې اته لاکه نورو افغان کډوالو ته په پاکستان کې د پاتې کېدو کارډونه ورکړی شوي دي.

د پاکستان حکومت د افغان کډوالو په دې هېواد کې په قانوني توګه د پاتې کېدو موده په داسې حال کې غځولې چې افغان ولسمشر اشرف غني د پاکستان په سفر ؤ.

د افغان کډوالو په پاکستان کې د پاتې کېدو وروستۍ نېټه د جون ۳۰ م (سبانۍ) ورکړی شوې وه.

د پاکستان د سرحدي چارو وزارت ويلي د افغان کډوالو د پاتې کېدو د مودې غځولو پرېکړه کابينې کړې وه، او د دې ترڅنګ يې هغو افغانانو ته چې سيټيزن کارډ لري د هغو د پاتې کېدو موده هم د روان کال ۳۱ اکتوبر پورې غځولې ده.

د کډوالو دپاره د ملګرو ملتونو ادارې يو اېن اېچ سي ار د پاکستان هرکلی کړی چې د کډوالو د پاتې کېدو موده يې تر يو کال غځولې ده.

د راپورونو ترمخه په افغانستان کې د بشري حقونو ډلې هم د پاکستان د فېصلې هرکلی کړی دی.

پاکستان د کلونو راهسې وايي غواړي چې افغان کډوال په خپله خوښه بيرته خپل هېواد ته ستانه شي.

د ملګرو ملتونو د ادارې ترمخه په دې موده کې به د کډوالو بيرته ستنېدو چې په خپله خوښه بیرته تلل غواړي، لړۍ دوام لري.

پاکستان کې زياتره افغان کډوال په خېبرپښټونخوا او بيا په بلوچستان صوبو کې اوسيږي.