د پاکستان سترې محکمې (سپريم کورټ) د قاسم سوري په اړوند د الېکشن ټربيونل فېصله ځنډولې ده. قاسم سوري د کوټۍ نه د قامي اسمبلۍ په چوکۍ منتخب شوی خو الېکشن ټربيونل د هغه کاميابي کالعدم ګرځولې وه.
د پاکستان تحریک انصاف ګوند په ټکټ په انتخاباتو کې برخه اخيستونکي قاسم سوري د الېکشن ټربيونل پرضد سپريم کورټ ته خواست کړی ؤ.
راپورونه وايي د سپریم کورټ درې کسيزه ډلې د سوري په خواست نن د ګل، دوشنبې په ورځ فېصلې اورلې او الېکشن کمېشن ته يې ویلي د هغه په چوکۍ دې د بيا انتخاباتو کولو نېټه نه ټاکي.
د ستمبر د میاشتې په ۲۷م نېټه د پاکستان د انتخاباتو ټربيونل د قومي اسمبلۍ د مرستيال سپيکر قاسم خان سوري ګټلي انتخابات کالعدم ګرځولي او د هغه په چوکۍ يې د بيا انتخاباتو کولو ويلي ؤ.
سوري په عامو انتخاباتو کې د قامي اسمبلۍ په اېن ای ۲۶۵ کوټه ۲ چوکۍ باندې کامياب ګرځول شوی ؤ.
ټربيونل په خپله فېصله کې د هغه په چوکۍ د بيا انتخاباتو کولو نېټه نه وه اعلان کړې خو ويل شوي ؤ د فېصلې ترمخه سوري کولی شي چې بيا په انتخاباتو کې برخه واخلي.
د سوري پرضد د هغه سيال کانديد نواب زاده لشکر رئيساني په انتخاباتو کې د درغليو خواست کړی ؤ.