د پاکستان د موسمياتو محکمې (پاکستان ميټرو لوجيکل ډيپارټمنټ) ويلي چې نن سهار درې منټه کم اته بجې د زلزلې جټکې ريکارډ شوي، چې زور يا شدت يې پينځه اعشاریه څلور درجې او مرکز يې له کوټې نه لويديځ ته 38 کلوميټره لرې او لس کلوميټره ژور ؤ.
د زلزلې جټکې په کوټه ، قلعه عبدالله ، چمن، مستونګ ، هرنايي ،سبي او نورو سيمو کې شوي دي.
د بلوچستان د پي ډي ايم اې د څارواکو په وينا زلزلې په يادو سيمو کې کوم ځاني او مالي تاوان نه دی اړولی خو بيا هم مالومات کولی شي.
د پوهانو په خبره کوټه او له کوټې سره نزدې سيمې په خطرناک پلېټ پرتې دي ، کله هم دلته لوی ځاني او مالي زيان د زلزلو د کيدلو له کبله رامنځ ته کيدلی شي .
له دې وړاندې په 1935 کال کې په کوټه کې شوې زلزلې کوټه سخته اغېزمنه کړې وه او د رپورټونو تر مخه په دې زلزله کې تر شل زره زيات خلک وژل شوي او په زرګونه ټپيان شوي وو.
له بلې خوا د کوټې او ژوب زون په بيلا بيلو سيمو کې نن له سهار څخه نری باران اوري چې له امله يې يخ زيات شوی دی.
د موسمياتو محکمې روانه اونۍ خبر جاري کړی وو چې د کوټه ، زيارت، ژوب او نورو سيمو کې د خالي له ورځې د نري باران او پر غرونو د واورې د واورې د ورېدو امکان دی.