د پاکستان وزيراعظم عمران خان د بل او ملېنډا ګېټس فاونډېشن شريک مشر بل ګېټس ته خواست کړی چې د افغان ولس بشري مرستې وکړي.
د پاکستان د وزیراعظم دفتر نن د شورو/ چهارشنبې په ورځ (شپږم اکتوبر) ويلي د نهې/ سه شنبې په ورځ شوو ټليفوني خبرو کې وزیراعظم عمران خان د بل ګېټس سره پاکستان کې د پولیو د ختمولو په پرمختګ خبرې کړي او د فاونډېشن د مرستو ستاينه يې کړې ده.
ويل شوي وزیراعظم او بل ګېټس په افغانستان کې د صحت په نظام هم اندېښنه څرګنده کړې ده. افغانستان د پاکستان سره په ګاونډ کې پروت هغه هېواد دی چرته چې د پوليو وبا اوس هم شتون لري.
عمران خان په افغانستان کې د پوليو ضد کمپاین په بيا روانولو ټينګار کړی چې هلته د دغه رنځ مخنیوي وشي چې پاکستان ورسره خوندي شي.
د پاکستان وزيراعظم دغه خبره په ګوته کړې چې د افغانستان د ابادۍ د نيمې نه زياته برخه د غربت د کرښې لاندې ژوند کوي او په دغه لړ کې مالي مرستو ته اړتيا لري.
عمران خان بل ګېټس ته خواست کړی چې د افغان ولس په بشري مرستو غور وکړي.
The Prime Minister highlighted that more than half of the population in Afghanistan was living below poverty line and in dire need of financial assistance. He requested Mr. Gates to consider providing humanitarian assistance to the Afghan people. #Afghanishtan
— Prime Minister%27s Office, Pakistan (@PakPMO) October 6, 2021
عمران خان ويلي په پاکستان کې سږ کال د پوليو يواځې يوه پېښه مخې ته راغلې ده او د پوليو نمونې په ملک کې تر ډېره حده کمې شوي دي.
نوموړي ټينګار کړی د پوليو د مخنيوي په لړ کې مثبت پرمختګ شوی او لا هم کار روان دی او حکومت يې ژمن دی چې د ملک څخه پوليو وايرس ختم کړي.
د وزیراعظم د دفتر ترمخه بل ګېټس د پاکستان هڅې ستايلي او ويلي يې دي فاونډېشن به يې د پاکستان مرستې دومداره ساتي چې يقيني کړي چې په ملک کې يو ماشوم هم د پوليو څخه معذوره نه شي.
په پاکستان کې سږ کال د پوليو د (WPV) ډول يوه پېښه او تير کال 84 پېښې مخې ته راغلې وې.
د پوليو مخنيوي د وېب پاڼې د شمېرو ترمخه په ملک کې د پوليو د دوېم ډول (cVDPV2) سږ کال تراوسه پورې اته او تير کال 135 پېښې رپورټ شوې وې.