په هند کې واکمن ګوند – بهارتیا جناتا پارټي (بي جې پي) – د اتوار/یکشنبې په ورځ اعلان وکړ چې د ګوند ترجمانه نوپور شرما یې د هغو تبصرو په وجه د عهدې نه لېرې کړې ده کوم چې هغې په یو ټلوېژن پروګرام کې د پیغمبر اسلام په اړه ویلي و.
بي جې پي په یو بیان کې چې په وېب سایټ باندې یې خپور شوی، ویلي دي چې دا ګوند د ټولو مذاهبو احترام ساتي. په بیان کې دا هم ویل شوي چې "بي جې پي د هر دین، هرو شخصیتونو ته سپکاوی، په کلکه غندي."
نوپور شرما پخپل ټوېټر لیکلي چې د هندواڼو یو خدای په اړه کومه تبصره شوې وه، او هغې بیا په جواب کې کوم څه ویلي دي، مګر دا یې قصد نه و چې ګني د چا مذهبي احساسات ژوبل کړي.
شرما زیاته کړې ده: "که زما الفاظو څوک ناآرامه کړې وي او یا یې مذهبي احساسات ور ژوبل کړې وي، زه بغیر د کوم شرط نه دا دی خپل بیان بېرته اخلم."
د بې جي پي ډلې دفتر ویلي چې د دې ډلې بل ترجمان نوین جندال یې هم د هغو بیاناتو په وجه د ګوند نه اخراج کړی چې د اسلام په باب یې سوشل مېډیا کې اظهار کړي و.
جندال پخپل ټوېټر ویلي چې هغه د هندو خدایانو په ضد د ځینو تبصرو په اړه پوښتنې راپورته کړې وې. د هغه وینا ده چې: "ما یوازې د دې تبصرو په اړه پوښتنې وکړې، زه د کوم مذهب په ضد نه یم."
د واکمن ګوند بي جې پي په بیان کې دا هم راغلي چې: "بهارتیا جناتا پارټي د هرې هغې نظریې کلک مخالفت هم کوي کومه چې د کوم مذهب یا فرقې سپکاوی کوي او یا یې بدتمیزي کوي. بي جې پي دغسې خلک او یا فلسفه مقبول نه ګرځوي."
د نوپور شرما د بیاناتو له امله، د هند نه بهر، د قطر او کویټ په شمول ځینو مسلمانو ملکونو هم د شکایت غږونه اوچت کړل.
پاکستان په یو بیان کې ویلي چې "په ډېرو کلکو الفاظو" د خورا توهین آمیزه بیاناتو مذمت کوِي. د پاکستان په جاري شوي بیان کې راغلي چې "پاکستان یوځل بیا په نړېوالې برادرۍ غږ کوي چې په هند کې د اسلاموفوبیا د ډېر تشویشناک صورتحال فوري ادراک وکړي".
په افغانستان کې واکمنو طالبانو چې حکومت یې تر اوسه هېچا په رسمیت ندی پېژندلی، بغیر د دې چې د هند د واکمن ګوند نوم واخلي، د هغه ګوند د ځینو غړو بیانات یې "په کلکو ټکو" غندلي او د هند له حکومته یې غوښتي دي چې "متعصبو اشخاصو" ته دې د اسلام د سپکولو او د مسلمانانو د احساساتو پارولو اجازت نه ورکوي.
دافغانستان اسلامي امارت په هند کې دحاکم ګوند دیوه مسئول لخوا داسلام ستر پیغمبر رسول الله صلی الله علیه وسلم ته ګستاخانه الفاظ کارول په کلکو ټکو غندي.دهند له حکومته غوښتنه کوو چې دغه ډول متعصبو اشخاصو ته اجازه ورنکړي چې داسلام مبارک دین ته سپکاوي وکړي او دمسلمانانو احساسات وپاروي
— Zabihullah (..ذبـــــیح الله م ) (@Zabehulah_M33) June 5, 2022
د قطر د خارجه چارو وزارت هم په یو بیان کې ویلي چې د توهین آمیزه بیاناتو په اړه یې دوحه کې د هند سفیر هم د شکایت اورېدو ته وربللی دی.
د کویټ ریاست هم د هند سفر په دې اړه بللی او ویلي چې هغه ته یې یو احتجاج لیک هم ورسپارلی په کوم کې چې د کویټ په وینا، د بي جې پي چارواکو بیانونه رد شوي او مذمت یې شوی دی.
د قطر د خارجه وزارت په بیان کې زیاته شوې چې هغه عربي ملک، د واکمن بي جې پي ډلې د دې فیصلې هرکلی کړی چې د توهین آمیزه بیاناتو په سر یې چارواکي ګوښه کړي دي، مګر قطر دا انتظار لري چې د هند حکومت د عوامو په مخکې کې معافي وغواړي او په فوري توګه هغه بیانونه وغندي.
नफ़रत सिर्फ़ नफ़रत को जन्म देती है। प्यार और भाईचारे का रास्ता ही भारत को प्रगति की दिशा में ले जा सकता है। ये भारत जोड़ने का वक़्त है। #BharatJodo
— Rahul Gandhi (@RahulGandhi) June 5, 2022
د حزب اختلاف – کانګرس – مشر راهول ګاندهي بغیر د دې چې د وروستیو بیاناتو یادونه وکړي، په خپل یو تازه ټویټ کې لیکلي چې: "نفرت صرف نفرتونه پیدا کوي. یوازې د مینې او ورورولۍ لاره ده چې هند د ترقۍ خوا ته وړلی شي. دا د هند دپاره د اتحاد وخت دی."
د دې رپوټ زیاتره برخه د رائټرز خبري ادارې نه اخېستل شوې ده.