واشنګټن (اېسوشیټډ پرس) - د افغانستان د پارلېمان یوه پخوانۍ غړې او د هغه یو تن ساتونکی د نامعلومو کسانو له خوا د هغې په خپل کور کې ووژل شوه. پولیسو ویلي چې دا پېښه د کابل ښار په احمدشاه بابا مېنه کې شوې ده.
مرسل نبي زاده، یوه پښتنه مېرمن او یوه له هغو په ګوتو شمار استازو له ډلې څخه وه چې د ۲۰۲۱ کال په اګسټ کې د طالبانو د راتګ نه پس هم په کابل کې پاته شوه.
هغه د پخواني نظام د پارلېمان اولنۍ غړې ده چې د طالبانو د واک اختیار لاندې کابل کې ووژل شوه.
د طالبانو د انتظامیې یو سیمه ییز پولیس چارواکي مولوي حمیدالله خالد ویلي چې مرسل نبي زاده او یو تن ساتونکی یې د هغې په کور کې وژل شوي، او یو ورور او بل ساتونکی یې زخمیان شوي دي.
طالب چارواکي دعوه لري چې د مرسل نبي زاده یو درېیم ساتونکی پیسې او زیورات اخیستي او تښتېدلی دی.
مولوي خالد زیاته کړې ده چې د پېښې په اړوند تحقیقات روان دي، مګر دا یې ونه ویل چې د واقعې اصلي سبب څه و.
د افغانستان د پخواني جمهوري نظام پیژندل شوي سیاستمدار ډاکټر عبدالله عبدالله، چې پخپله هم د طالبانو د ولقې لاندې کابل کې اوسيږي، وویل چې د مېرمن نبي زاده په مرګ ډېر خواشینی شوی او امید یې څرګند کړی چې د دې قضیې عاملینو ته دې سزا ورکړی شي. ډاکټر عبدالله زیاته کړې چې مرسل نبي زاده "د خلکو نماینده او خدمتگاره" بللې ده.
مرسل نبي زاده څه موده وړاندې د افغانستان خصوصي ټلوېژن – شمشاد – سره په یوه مرکه کې ویلي و چې افغانان باید یو بل ومني او د وطن جوړولو دپاره اتفاق وکړي.
د ولسي جرګې پخوانۍ غړې مرسل نبي زاده په کابل کې په ډزو وژل شوې ده. هغه د جمهوریت د نسکورېدو وروسته هېواد کې پاتې وه او وخت نا وخت به یې په تلویزوني خپرونو کې هم ګډون کولو. روښان فکره، تحصیل کړي او ویښ پښتانه داسې د خامار خوراک شي 😰 pic.twitter.com/CqWvzH6rsO
— Khalid Amiri (@KhalidAmiri01) January 15, 2023
هغه په ۲۰۱۹ کال کې په ولسي جرګه کې د کابل د خلکو استازې وټاکل شوه او د ژوند تر پایه په کابل کې پاته شوه.
هغه په پارلېمان – ولسي جرګه – کې د دفاع د کمیشن غړې وه او په یو غیردولتي تنظیم کې چې کار یې د بشري وسایلو تحقیق او ترقي وه، هم دنده درلوده.