د پاکستان کرکټ لوبډلې په هند کې د راتلونکي يو ورځني نړيوال جام 2023 په سياليو کې د ګډون په معامله د پاکستان وزيراعظم د لوړې کچې کميټي جوړه کړې ده. کميټي به وزيراعظم ته سپارښتنې کوي او د هغې وروسته به هند ته د لوبډلې د لېږلو پرېکړه کېږي.
پاکستاني مطبوعاتو ویلي، حکومتي وزیرانو ورته د کمېټۍ جوړول تاييد کړي دي، خو د پاکستان سرکاري ميډيا يا وزيرانو په رسمي ډول د کمېټۍ جوړولو څه نه دي ویلي.
د پاکستان کرکټ بورډ روانه اوونۍ وزيراعظم، د کورنيو او بهرنيو چارو وزيرانو ته خط استولی او ترې غوښتي يې وو لوبډلې ته دې په هند کې د نړیوال جام په سياليو کې د لوبېدو دپاره اجازه ورکړي.
پاکستانۍ رسنیو ویلي، وزيراعظم شهباز شریف د بهرنيو چارو وزیر بلاول بټو زرداري په مشرۍ او د وزیراعظم د ځانګړي سلاکار طارق فاطمي په رابطه کارۍ کې د لوړې کچې کميټي جوړه کړې ده.
ويل شوي په کمېټۍ کې د کورنيو چارو ، قانون او اطلاعاتو د وزيرانو سره نور وزيران او سيکرټريان شامل کړی شوي دي.
ياده کميټي به هند ته د پاکستان د کرکټ لوبډلې معامله ګوري او وزيراعظم ته به په دغه اړوند سپارښتنې کوي او وروستۍ فېصله به وزيراعظم کوي.
د کرکټ نړيوالې شورا [آی سي سي] په 27 جون د راتلونکي يو ورځني نړیوال جام 2023 د سياليو نېټې اعلان کړې وې يادې سيالۍ به په هند کې کيږي.
د نړيوال جام سیالۍ به په پينځم اکتوبر پېل کيږي او فاينل يا پایلوبه به په 19 نومبر د هند په احمد اباد ښار کې وي.
پاکستان به د هند د لوبډلې سره په 15 اکتوبر په احمد اباد کې مخامخ کيږي.
د 2019م نړيوال جام انګلېنډ ګټلی وو.
د کرکټ يو ورځني نړيوال جام سیالۍ په 1975 کې پېل شوي تراوسه 12 ځله د نړيوال جام سيالۍ شوي، پاکستان يواځې يو ځل په 1992 کې نړيوال جام ګټلی وو.