د خېبر پښتونخوا د ترهګرۍ ضد محکمې پولیس (سي ټي ډي) وایي له افغانستان سره په پوله پرته د پښتونخوا قبایلي ضلع خېبر کې یې د یوې نښتې په مهال درې ترهګر وژلي دي.
د خالي- شنبې په ماسخوتن د ترهګرۍ ضد محکمې پولیسو پخپل بیان کې ویلي چې د ترهګرو پرضد دا عملیات د خېبر د علي مسجد په شاګۍ سیمه کې شوي دي.
په بیان کې ویل شوي چې د عملیاتو په مهال د ترهګرو اؤ امنیتي ځواکونو ترمنځ نښته شوې چې پکې درې ترهګر وژل شوي دي.
د سي ټي ډي په بیان کې ویل شوي چې په وژل شوؤ ترهګرو کې د دوؤ کسانو پېژندګلو شوې ده چې تعلق یې د باړې ملک دین خیلو سره دی اؤ وایي د یو بل وژل شوي تن پېژندګلو لا نه ده شوې.
د سیمې نه سرچینو وي او ای ډیوه ته ویلي چې د سي ټي ډي پولیسو سره نښته کې د وژل شوؤ توندلارو مړي د پوسټ مارټم لپاره د جمرود هسپتال ته وړل شوي اؤ ویل کیږي دغه درې واړه جسدونه په ګولیو سوري سوري دي.
په 25مه جولايۍ د خېبر په علي مسجد سیمه کې د یو جومات دننه ځانمرګی برید شوی ؤ چې پکې د عدنان اپریدي په نوم د پولیسو یو افسر یا ایډیشنل ایس ایچ او وژل شوی ؤ .
په نهم اګست د سي ټي ډي پوليس ایډيشنل ايي جي سهېل خالد په يوه خبري غونډه کې دعوه کړې وه چې د خېبر د علي مسجد په پېښه کې ککړ ټول ورانکاري او سهولت کار نيول شوي دي.
په پاکستان کې د تېر قابو یو کال راهسې یو وارې بیا د ترهګرۍ لړۍ چټکه شوې ده اؤ د ملک په بیلابیلو برخو کې ترهګرو په امنیتي ځواکونو مرګوني ګزارونه کړي چې پکې په سوونو امنیتي سرتیري وژل شوي اؤ ژوبل شوي دي.
د څېړنیزو ادارو رپورټونه ښیي چې د ترهګرۍ په روانه څپه کې تر ټولو زیات بریدونه د خېبر پښتونخوا په قبایلي ضلعو کې شوي دي اؤ ورپسې په دوهم نمبر بیا بلوچستان صوبه د ترهګرۍ سره مخ پاتې شوې ده.
پاکستان کې د یوې غیر دولتي څېړنیزې ادارې پاکستان انستيټیوټ فار کنفلکټ اینډ سیکورټي سټديز تازه رپورټ وایي سږ کال داګست په میاشت کښې په ګرد هیواد کښې د ترهګرۍ 99 پیښې رپورټ شوې دي چې دا د 2014م نه راپدېخوا په یوه میاشت کښې تر تولو زیاتې پېښې دي.
د پاکستان پوځ څو واري د ترهګرو تنظیمونو پرضد په پراخه کچه عملیات کړي دي اؤ څو واري یې دا دعوې هم کړې دي چې د ترهګرو ملا یې ماته کړې ده خو د غیر دولتي ادارو رپورټونه وايي په کابل د طالبانو له واکمنېدو وروسته په پاکستان کښې ترهګري یو ځل بیا سیوا شوې ده.
پاکستان هیواد کې د ترهګرۍ د چټک شوي بهیر تور افغانستان کښې په موجودو ترهګرو تنظیمونو لګوي خو په افغانستان واکمن طالب چارواکي بیا دا تورونه ردوي اؤ وایي په افغانستان کې ترهګرې ډلې نه شته.