په پاکستان کې د شمېر شمېرو دولتي اداره وایي د تېرې اوونۍ په مهال د یو شمیر خوراکي توکیو بیعې لوړې شوې دي او په کالني بنیاد په پاکستان کې ګراني 26.32 فیصدي ته رسېدلې ده.
د خوراکي توکیو تر څنګ په پاکستان کې د تېلو اؤ بجلۍ نرخونه هم په بره تللي دي چې پرضد یې د تېرې اوونۍ راهسې د پاکستان په بېلابېلو ښارونو کې د ولسي احتجاجونو لړۍ پیل شوې ده .
د شمېرو دولتي ادارې پخپل تازه اوونیز رپورټ کې ویلي، په یوه اوونۍ کې ټماټر 17 فیصده، د مسورو دال 10.8، چیني یا بوره 6.7، اوږه 4.6، ګوړه 3.6 او د مهیو دال 3.5 فیصده ګران شوي دي.
همدا شان په یوه اوونۍ کې د پیازو نرخ 3.4 فیصده، د چڼو د دالو نرخ 3.2، د ډیزلو نرخ 6.2، د ایل پي جي ګېس نرخ 5.1 او د پټرولو نرخ 5.1 فیصده په بره تللی دی.
خو رپورټ بیا وایي چې چرګانو نرخ 3.2 فیصده اؤ د خوراکي تېلو د 5 لیټرو نرخ یو فیصد کم شوی دی.
د رپورټ تر مخه په تېره یوه اوونۍ کې په پاکستان کې د 32 شیانو نرخونه په بره تللي دي اؤ د 5 شیانو نرخونه بیا کم شوي دي.
د اقتصادپوهانو په نظر داسې اندېښنې شته چې په راتلونکو ورځو کې د تېلو، بجلۍ او ګېسو قيمتونه نور سېوا شي او عامه ګراني به ورسره نوره هم لوړه شي .
دتېرې اوونۍ په مهال په پاکستان کې د روپۍ ارزښت پرله پسې په لاندې روان شوی ؤ اؤ په بینکونو کې یو ډالر په 307 اؤ په خلاص مارکیټ کې په 328 روپۍ پلورل کېدو.
خو د تېرو دوؤ ورځو راهسې یو ځل بیا د روپۍ ارزښت کې یو څه زیاتوالی لیدل شوی اؤ په خلاص مارکیټ کې نن د جمعې په ورځ یو ډالر په 303 روپو تبادله شوی دی. په خلاص مارکیټ کې بیا روپۍ د ډالر په مقابل کې له 328 نه 312 روپیو ته راغلې ده.