د پاکستان د انتخاباتو کمیشن وایي په تېرو څلورو کلونو کې د هېواد په ټولو صوبو کې د هغو کسانو شمېر 21 میلینه زیات شوی دی چې د ملک په عمومي انتخاباتو کې به رایې یا ووټونه اچوي.
کمیشن د نهې- سه شنبې په ورځ پر خپل ایکس [مخکیني ټویټر] په هېواد کې د زیاتو شویو ووټرانو فهرست خپور کړی، چې پکې ښکاري د 2018م کال د ټاکنو په وخت د رایو ورکوونکو شمېر تقریباً 106 میلینه وو او سږ کال دا شمېر شاوخوا 127 میلینه ته رسېدلی دی.
د انتخاباتو کمیشن د نوملړ له مخې په ټول ملک کې د ښځو رایو ورکوونکو شمېر د تېرو عمومي ټاکنو په نسبت له 46.7 میلینه څخه 58.5 میلینه ته رسېدلی دی، چې وایي دا د ټولو ووټرانو 46 فیصده جوړوي.
همدارنګه د نارینه ووټرانو شمېر چې په تېرو انتخاباتو کې 59.2 میلینه وو سږ کال یې شمېر 68.5 میلینه ته رسېدلی دی چې وایي دا د ټولو رایه ورکوونکو 54 فیصده جوړېږي.
د نویو شمېرو له مخې په پنجاب کې تر ټولو زیات رایه ورکوونکي 72.3 میلینه ریکارډ شوي دي، ورپسې د سیند صوبې د ووټرانو شمېر 26.6 میلینه دی، د خيبر پښتونخوا 21.6 میلینه دی، د بلوچستان شمېر 5.2 میلینه او د سر ښار اسلام اباد د رایه ورکوونکو شمېر څه باندې یو میلین ته رسېدلی دی.
د 2023م کال د شمېرو له مخې د 18 او 35 کلونو تر منځ د رایه ورکوونکو شمېر شاوخوا 57.1 میلینه ته رسېدلی دی، چې تر تېرو انتخاباتو څه کم درې فیصده زیات شوي دي.
د هغو کسانو چې عمرونه یې د 36 او 45 کلونو تر منځ دي، شمېر27.7 ته رسېدلی، د 46 او 55 کلونو تر منځ کسانو شمېر 18.1 میلینه ته رسېدلی، د 56 او 65 کلونو تر منځ کسانو شمېر 11.8 میلینه زیات شوی او د 66 او تر دې زیاتو کلونو عمر لرونکو ووټرانو شمېر څه باندې 12 میلینه زیات شوی دی.
د پاکستان د انتخاباتو کمیشن د ووټرانو د زیاتېدو فهرست د راتلونکو عمومي ټاکنو لپاره تر تیاریو مخکې خپور کړی دی او ټاکل شوې چې په نومبر میاشت کې ټاکنې وشي خو لا یې نېټه نه ده اعلان شوې.