امریکې د پاکستان د بلوچستان صوبې په مستونګ ښار کې د عید میلادالنبي په جلوس شوې چاودنه کې د وژل شوو او ژوبلو سره د خواخوږۍ څرګندونه کړې او ويلي يې دي پاکستان ته ترهګرۍ غټ تاوان اړولی دی.
د امریکې د بهرنیو چارو وزارت د ویاند ميتو ميلر نه په خبري غونډه کې پاکستان سره د ترهګرۍ پرضد د امريکايي مرستو په حواله پوښتنه شوې او هغه یې په ځواب کې ویلي، "څو پورې چې د ترهګرۍ ضد مرستو سوال دی، نو مونږ د پاکستان سره په دغه لړ کې په بېلابيلو برخو کې مرستې کوو او په هغې کې په ترهګرۍ کې نومول شوو کسانو او تنظيمونو ته د ماتې ورکولو تګلارې شاملې دي".
هغه زياته کړې، "په دغه لړ کې د روان کال په لومړو کې مونږ دواړو ملکونو ته د ترهګرۍ د ګواښونو په تړاو، د لوړې کچې ناسته کړې او په هغې کې په داسې برخو کې په مرستو کولو د کار کولو ویل شوي وو چې په کې په پولو د امنیت او ترهګرۍ دپاره مالي مرستې شاملې وې".
د نوموړي په خبره، "مونږ د دې باور دپاره د پاکستان سره مرستې دوامداره ساتو چې د پاکستان په هغو برخو کې زياتې مرستې وشي کومې چې د هر ډول ترهګرۍ او توندروۍ د خاتمې دپاره وي".
د بلوچستان صوبې په مستونګ سیمه کې د جمعې په ورځ [29 ستمبر] د عيدميلاد النبي په جلوس چاودنه کې د ځايي ميډيا ترمخه نزدې 60 کسان وژل شوي وو.
د پېښې ذمه واري تراوسه چا نه ده منلې او د يادې پېښې مقدمه د نامعلومو کسانو پرضد درج کړی شوې ده.
د پاکستان د کورنيو چارو نګران وزير سرفراز بګټي ويلي وو، ترهګر چې هر ځای وي پرضد به یې بشپړه کارروايي کولی شي او ټولې ځالې ورته معلومې دي.
بګټي د مستونګ په پېښه کې د وژل شمېره 55 او ژوبلو شمېره 139 ياده کړې وه. هغه ویلي وو، ترهګر به له خپلو غارو راباسي او تر خپل انجامه به یې رسوي.
پاکستان کې د ترهګرۍ په پېښو نظر ساتونکې غېر دولتي څیړنیزې ادارې [پاکستان انسټيټیوټ فار کنفلکټ اېنډ سیکيورټي سټدیز يا پکس] ويلي، د اګست د میاشتې په مقابله کې په ستمبر کې په پاکستان کې د ترهګرۍ پېښې کمې رپوټ شوي خو مرګ ژوبلې پکې زياتې شوي دي.
د رپوټ ترمخه سږ کال په وړومبو نهو مياشتو کې په ګرد هیواد کې د ترهګرۍ 489 پېښې رپوټ شوي او په دې کې په مجموعي توګه 763 تنان وژل شوې دي او د تېرکال په مقابله کې سږ کال په نهو میاشتو کې ترهګري 29 فیصدي زیاته شوې ده.
پاکستان انسټيټیوټ فار کنفلکټ اینډ سیکيورټي سټدیز يا پکس ویلي، د ستمبر په میاشت کې د ترهګرۍ 65 پېښې رپوټ شوې دي 136 کسان پکې وژل شوي او د اګست په میاشت کې د ترهګرۍ 99 پېښې رپورټ شوې وې خو په هغه میاشت کې ځاني تاوان د ستمبر په مقابله کې کم شوی وو.
په رپورټ کې ویل شوي، د بلوچستان په مستونګ کې شوې د ترهګرۍ غټې پېښې له امله د ستمبر په میاشت کې ځاني تاوان زیات شوی دی.