په افغانستان د واکمنو طالبانو د حکومت د بهرنیو چارو وزیر ښاغلي امیر خان متقي تور لګولی دی چې پاکستان د افغان کډوالو اؤ بشري حقونو له معاملو څخه په خپله ګټه کار اخلي.
د طالبانو د حکومت د بهرنیو چارو وزارت وايي، چې ددغه وزارت سرپرست امیرخان متقي افغانستان لپاره د ملګرو ملتونو د مرستندویه پلاوي د دفتر "یوناما" د مشرې روزا اتونباييفا سره په کتنه کې له پاکستان څخه د افغان کډوالو د اجباري ستنیدلو په مسله خبرې کړي دي.
د طالبانو د حکومت د بهرنیو چارو د وزارت ویاند عبدالقهار بلخي په ټولنیزه رسنۍ ایکس(پخواني ټویټر) د دغې لېدنې اعلامیه خپره کړې ده چې د هغې تر مخه امیر خان متقي ویلي پاکستان هڅه کوي د بیلابیلو مقصدونو ترلاسه کولو لپاره افغان کډوالو اؤ بشري معاملو نه د ځان په ګټه کار واخلي اؤ په دې لړ کې د خپلو خلکو، سیاستوالو او پوهانو خبرو ته هم غوږ نه نیسي.
اعلامیه کې ویل شوي امیر خان متقي پاکستان کې له افغان کډوالو سره د پاکستاني پولیسو اؤ امنیتي ځواکونو لخوا په کېدونکي چلند هم نیوکې کړې دي.
د پاکستان حکومت په سمدستي توګه لا د طالبانو دخارجه وزیر څرګندونو ته کوم غبرګون نه دی ښودلی خو تر دې وړاندې پاکستاني چارواکو وخت په وخت له افغان کډوالو سره د ناروا چلند تورونه رد کړي دي.
د پاکستان حکومت ملک کې میشتو ټولو غیر قانوني وګړو ته تر ۳۱ اکتوبره مهلت ورکړی ؤ چې باید تر دغې نېټې پخپله خوښه له پاکستانه ووځي ګنې تر هغې وروسته به یې پرضد قانوني ګامونه اخستل کیږي.
د یاد مهلت له سرته رسېدو سره سم پاکستان نه د افغان کډوالو خپل هیواد ته د ستنېدو لړۍ چټکه شوې ده اؤ په زرګونو کورنۍ په تېرو څو ورځو کې افغانستان ته ستنې شوې دي.
پاکستان کې په دې وروستیو کې د ترهګرۍ رامنتځته شوؤ یو شمیر پېښو کې پاکستاني چارواکو افغانانو ته د ملامتیا ګوته نېولې ده اؤ وایي د طالبانو حکومت ته یې ثبوتونه هم ورکړي دي چې پاکستان کې ترسره شوؤ د ترهګرۍ یو شمیر پېښو کې ځېنې افغانان ککړ دي.
خو طالب چارواکو د پاکستان دا تورونه رد کړي دي اؤ وایي ترهګري د پاکستان خپله ستونزه ده اؤ پکار ده چې دوي یې د کور دننه هواره کړي.
د طالبانو د بهرنیو چارو وزیر امیر خان متقي ویلي د دوي حکومت پاکستان نه ستنېدونکو افغانانو لپاره پلان جوړ کړی دی چې د هغې له مخې به دغو افغانانو سره د لږې اؤ اوږدې مودې لپاره په بیا ابادیدو کې مرستې کولی شي.
په دغه موقعه افغانستان لپاره د ملګرو ملتونو د مرستندویه پلاوي د دفتر "یوناما" مشرې روزا اتونباييفا ویلي چې هغوي وضعیت باندې نظر ساتلی دی اؤ هڅه کوي چې بېرته ستنېدونکو کډوالو سره د مرستې لپاره د نړۍ پام راوګرځوي.
افغانستان ته د ستنېدونکو کډوالو د ستنولو لپاره پاکستان د تورخم سره نزدې یو عارضي کیمپ جوړ کړی دی چې دغلته له نوم لیکنې وروسته افغانان بېرته خپل هیواد ته اړول کیږي.
د طالبانو د حکومت د رییس الوازارا د مرستیال مولوي عبدالسلام حنفي په مشرۍ د سه شنبې په ورځ د طالبانو یو لوړپوړي پلاوي په تورخم کرښه د راستنېدونکو کډوالو لپاره د شوؤ انتظاماتو جاج اخستی ؤ.
په اسلام اباد کې د افغانستان د سفارت ناظم الامور سردار محمد شکیب هم تېره ورځ دپاکستان د کورنیو چارو نګران وزیر سرفراز بګټي سره لېدنه کړې وه اؤ د ستنېدونکو کډوالو په مشکلاتو یې ورسره خبرې کړې وې.
د افغان سفارتخانې لخوا د خپور شوي بیان ترمخه افغان ناظم الامور د پاکستان د کورنیو چارو وزیر سرفراز بګټي سره خبرو کې د افغانانو د بېرته ستنولو عمل کې په اسانتیاؤ رامنځته کولو ټینګار کړی ؤ.