د طالبانو حکومت افغانانو ته د هند له خوا د ویزې د ورکولو د بهیر د پیل په اړه د هند د بهرنیو چارو وزارت ویاند رندیر جیسوال د څرګندونو هرکلی کړی دی.
د طالبانو د حکومت مرستیال ویاند حمدالله فطرت د طالبانو تر کنټرول لاندې قامي ټیلي ویژن سره په مرکه کې هیله ښودلې چې هند به افغانانو ته د ویزې د ورکولو لړۍ ژر پیل کړي.
هغه ویلي:" افغانان د روغتیا، تحصیل او سوداګرۍ په برخو کې زیات ضرورتونه لري که هند دغه پروسه پیل کړي نو په دې سره به د زیات شمیر افغانانو ستونزې حل شي او مونږ هیله من یو چې د هند دوست هیواد به د ویزو ورکړه پیل کړي".
د هند د بهرنیو چارو وزارت د انټرنیټي پاڼې د رپورټ له مخې د هند د بهرنیو چارو وزارت ویاند رندیر جیسوال د جولاۍ 25 په نوي ډهلي کې یو خبري کانفرنس ته د وینا پرمهال افغانانو ته د ویزې د ورکولو د بهیر د بیا پیلیدو خبر ورکړی وو.
هغه د یو خبریال د پوښتنې په ځواب کې ویلي:" بلې افغانانو ته د ویزې ورکول روان دي اودا کار روان دی".
رندیر جیسوال وویل چې هند د افغانستان د خلکو سره تاریخي اړیکې لري او زیاته یې کړه چې د هند د حکومت په بجټ/ بودیجه کې افغانستان سره د بشري مرستې لپاره د بودیجې ځانګړي کیدل ددغه ملګرتوب او ژمنې بیلګه ده.
تراوسه د هند له خوا افغانانو ته د ویزو د بیا پیلیدو په اړه ډیر معلومات نشته او دا لا هم څرګنده نه ده چې هند به افغانانو ته په کابل کې د خپل سفارت له لارې او که د ایران او پاکستان په څیر په انلاین بڼه په نوي ډهلي کې د بهرنیو چارو وزارت له لارې ویزې ورکړي.
هند د یو شمیر نورو هیوادونو په څیر د ۲۰۲۱ کال د اګست په میاشت کې په افغانستان کې واک ته د طالبانو د بیا رسیدلو سره هممهاله کابل کې خپل سفارت وتاړلو او افغانانو ته یې نه یوازې د ویزو د ورکولو لړۍ بنده کړه، بلکې په سلګونو افغان زده کوونکو ته چې د لوړو زده کړو د دوام لپاره د هند د حکومت په سکالرشپونوهندي پوهنتونونو ته معرفي شوي وو هم د ویزو ورکول بند کړي وو.
که څه هم هند د ۲۰۲۲ کال د جون په میاشت کې په کابل کې خپل سفارت بیرته پرانیستی دی، خو دغه سفارت لا افغانانو ته قونصلګری خدمتونه نه دي پیل کړي.
اوس مهال کابل کې د پاکستان او ایران سفارتونه افغانانو ته په انلاین ډول ویزې ورکوي او ترکیه هم د بشري خواخوږۍ له مخې افغان ناروغانو ته ویزې ورکوي.
هند د افغانستان په څو اقتصادي شریکانو په ډله کې دی. تیرکال افغانستان هند ته د ۵۰۰ میلیونو ډالرو څخه په زیاتو پیسو سوداګریز توکي په ځانګړي ډول وچې او تازه میوې صادرې کړې وې.
یادونه:- رپوټ د وي او اې اشنا له ویبپاڼې نه اخیستل شوی دی.