هندوستان به په کال ۲۰۲۵ کې په ګګنیان نومې مشن کې څلور خلابازان د ځمکې خلايي مدار ته لېږي چې د انډین سپېس ريسرچ ارګنایزېشن نومې ادارې د خلايي تحقیق په برخه کې اهم پرمختګ ګڼل کېږي.
د هندوستان وزیراعظم نرندره مودي د نهې، سه شنبې، په ورځ د کېراله ریاست د وېکرم سرابای سپېس سېنټر نومې خلايي تحقیقي مرکز کې خلا ته تلونکو خلابازانو ته اېسټروناټ وينګز یا د خلابازانو وزرونه ورکړل.
مودي د خلابازانو ستاینه وکړه او ويې وېل دوی به د هندوستان زرګونو ماشومان وهڅوي او هغه ماشومان چې "نن د کاغذ جهازونه جوړوي ستاسو په شان د ساینسدانان د جوړېدو خوبونه به وېني."
مودي د هند د خلايي تحقیق ساینسدانانو ته وویل "تاسو ټول د مستقبل د موقعو نوي دروازې خلاصوئ."
مودي خلا ته د تلونکو خلا بازانو اجیت کرېشنن، پراسنات بالاکرېشنن نایر، انګد پراتاب او د سباهانسو شکلا په درېشیو د خلابازانو وزرونه ولګول.
مودي د خلابازانو په اړه وویل چې د یوازې څلور کسان نه دي بلکې د هغه په قول څلور شکتي، د طاقت دیوتا، دي چې د هندوستان د یو اشاریه څلور بېلین ابادۍ ارمانونه به خلاف ته رسووي.
ګګنیان د هندوستان وړمبی مشن دی چې په زریعه به يې خلابازان خلا ته لېږل کېږي. د اندازې ترمخه په دې پروګرام به یو اشاریه اته بېلین ډالر خرچه کېږي.
د پروګرام ترمخه، څلور واړه هندي خلابازان به په خلا کې درې ورځې تېروي او بیا به د هندوستان په اوبو کې راکوزېږي.
د دې نه مخکې مودي اعلان کړی و چې هندوستان به د کال ۲۰۳۴ پورې خلايي مرکز جوړوي او په ۲۰۴۰ کې خلا بازان سپوږمۍ ته لېږي.
د تېر کال د اګست په میاشت کې هندوستان د امریکې، روس او د چین نه پس د دنیا څلورم ملک شو چې د سپوږمۍ په سطح يې د انسان نه بغېر خلايي سیاره کښېنوله. سیارې بیا تحقیقي کار شروع کړو.
په کال ۲۰۰۸ کې سپوږمۍ ته تحقیقاتي مشن د لېږلو وروسته د هندوستان په خلايي تحقیقاتي پروګرام کې چټکتیا او پراختیا شوې ده او په انتهايي کمو پېسو يې کامیابۍ يې د خلايي تحقیق د منل شوو قوتونو برابر کچې ته په رسوولې دي. هندوستان په خلايي تحقیق خرچه ځکه هم کمه ساتلی شي چې د موجوده ټېکنالوجۍ نقل کوي او یا پکې بدلونونه کوي او انتهايي هنرمند انجېنران لري چې د غېر ملکي همکارانو په مقابل کې په انتهايي کم معاش کار کوي.