په کال ۲۰۲۱ کې په افغانستان طالبانو د بیا واکمنېدو راهسې په سیاسي توګه د فعالو افغان مېرمنو خلاف د انټرنېټ دلارې د نفرت خبرې، بدې ردې او د هغوی ویرول کېدل او په هدف کېدل زیات شوي دي. دا خبره په برطانیه کې مېشت د انساني حقونو تنظیم د ګل، دوشنبې، په ورځ شایع شوي خپل رپورت کې وکړه.
د انساني حقونو تنظیم سېنټر فار انفارمېشن رېزېلینس د افغان وېټنس نومې پراجېکټ يا منصوبې دلارې موندلي چې د کال ۲۰۲۱ د جون او د ډسمبر د میاشتو ترمنځ او د کال ۲۰۲۲ په هم دغه موده کې په انټرنېټ د ښځو په ضد د بدو ردو په پوسټونو کې ۲۱۷ فیصد اضافه شوې ده.
طالبانو د واکمنۍ راهسې انټرنېټ دلارې د ښځو د ځورول کېدو د تحقیقاتو په لړ کې افغان وېټنس یا افغان شاهد پراجېکټ په اېکس، پخواني ټوېټر، د پرتو معلوماتو تجزیه کړې کې او د شپږو افغان مېرمنو سره يې ژورې مرکې کړي دي.
د رپورټ ترمخه د ادارې تحقیق کوونکو په پښتو او دري ژبو کې د ۷۸۰۰۰ نه زیاتو هغو پوسټونو تجزیه کړې چې په سیاسي توګه قریباً ۱۰۰ افغان مېرمنو د اکاونټونو په اړه لیکل شوي وو.
افغان وېټنس سره مرکه کوونکو افغان مېرمنو وویل لوڅ پېغامونه او د جنسي تشدد او د مرګ دړکې ورکړی شوي دي.
د طالبانو د حکومت ترجمان سره په رپورټ د دریځ معلومولو په لړ کې رابطه ونشوه خو طالبان په عمومي توګه د ښځو په اړه د خپلو تګلارو دفاع کوي.
رپورټ موندلي چې د ښځو په ضد په بدو ردو کې د جنسي بې لاریتوب الزامات، په سیاسي توګه فعالې ښځې د مذهبي او ثقافتي دودونو خلاف ورزي کوي، دا الزام چې په سیاسي توګه فعالې ښځې د مغربي نړۍ اېجنټانې وي او دا چې بهر ملکونو د پناه اخیستلو دپاره د دروغو دعوې کوي.
د افغان عېني شاهدینو ترمخه په ۲۰۲۲ کې په انلاین زیاتره یا ۶۰ فیصد بدو ردو کې جنسي الزامات شامل وو چې په کې ښځو د پېسو په بدل د جنسي فعل کولو الزامات لګول شوي وو.
د افغان وېټنس د تحقیق کوونکو د ډلې مشرې فرانسېسکا جېنټایل وویل طالبانو د واکمنېدو راهسې سوشل میډیا په سیاسي او سماجي موضوعاتو د رای د اظهار د مېدان په ځای په خصوصي توګه د بدو ردو ځای جوړ شوی دی.
طالبانو د ښځو په کار روزګار او د شپږم ټولګي نه پورته د جینکو په تعلیم پابندي لګولې ده.
جېنټایل وویل ښځو او د ښځو د حقونو سره د طالبانو دښمني په انټرنېټ ښځې زوروونکو ته دا پېغام ورکوي چې په هغو ښځو حملې جایزې دي چې د خپلو حقونو دپاره ودرېږي.
یوې ښځینه خبریالې د نوم نه څرګندولو په شرط افغان وېټنس ته وویل چې هغې په سوشل ميډیا خپل اکاونټونه بند کړي دي.
د رپورټ ترمخه، ښځو د زورولو په شا زیاتره سړي دي چې د مختلفو قومونو او سیاسي تړونو سره تعلق لري.