د پاکستان د حکومت د قانون مرکزي وزیر ويلي، د سپريم کورټ د مخصوصو څوکيو په اړه فيصلې څخه حکومت ته هيڅ خطره نشته، څوکۍ سني اتحاد کونسل غوښتې خو پاکستان تحريک انصاف (پي ټي آی) ته ورکړل شوې. او د وزيراعظم مشير رانا ثناالله د سپريم کورټ په فيصله نيوکې کړي او ويلي يې دي، د سپريم کورټ فيصله د آيين بيا ليکلو برابر خبره ده.
د پاکستان سپريم کورټ پرون په 12مه جولايۍ د قامي او صوبايي اسمبليانو د ښځو او لږکيو د مخصوصو څوکيو په اړه د پېښور هايکورټ او الېکشن کمېشن فېصلې کالعدم کړې او حکم یې کړی پاکستان تحریک انصاف (پي ټي آی) د مخصوصو څوکيو حقداره ګوند دی.
د چيف جسټس قاضي فايز عيسا په مشرۍ د سپريم کورټ 13 کسيزه فل کورټ بنچ د سني اتحاد کونسل په خواست فيصله اورولې ده. په 13 ججانو کې اتوو د فېصلې حمايت او پينځو یې اختلاف کړی دی.
د سپريم کورټ فيصلې ته په غبرګون کې د قانون مرکزي وزیر، اعظم نزير تارړ په يوه خبري غونډه کې ويلي، د فيصلې څخه داسې څرګنديږي چې د آيين مادې بيا ليکل شوي دي.
هغه زياته کړې، مرکزي کابينه به فيصله کوي چې د فيصلې خلاف نظر ثاني وکړي که نه، د سپريم کورټ فيصلې پوښتنې راولاړې کړي دي.
او د وزیراعظم شهباز شريف مشير رانا ثناالله په خبري غونډه کې د سپريم کورټ په فيصله نيوکې کړي او ويلي يې دي، دا د نظرثانۍ مقدمه جوړېدی شي.
هغه ويلي، داسې فيصلې چې د پوهې نه بهر وي د ملک په ګټه نه تماميږي، او زياته کړې یې ده، هغه غړي چې د څوکيو څخه لرې کړل شوي هغوی هم په سپريم کورټ کې اپيل کولی شي.
د پاکستان تحریک انصاف چيرمېن بېرسټر ګوهر پرون د فيصلې وروسته مطبوعاتو سره خبرو کې وويل، نن سپريم کورټ تاریخي فيصله واوروله، او د الېکشن کمېشن نه یې غوښتنه وکړه د سپريم کورټ فيصله دې سمدستي عملي کړي او مخصوصې څوکۍ دې پي ټي آی ته ورکړي.
د پاکستان رسنیو د الېکشن کمېشن د سرچینو له قوله د سپريم کورټ فيصلې ته په غبرګون کې ویلي، سپريم کورټ ته سني اتحاد کونسل خواست کړی وو.
پي ټي آی نه خو د پېښور هايکورټ په وړاندې فريق وو او نه د سپريم کورټ، او پي ټي آی ته مخصوصه څوکۍ ورکول د پوهې نه بهر خبره ده.
رسنيو خېبرپښتونخوا کې د پاکستان پيپلز ګوند سره تعلق لرونکي ګورنر فېصل کريم کنډي له قوله ويلي، ګوند به یې د سپريم کورټ فيصلې ته غبرګون وايي او د نظر ثانۍ کولو يا نه کولو پرېکړه به کوي.
د جمعیت علما اسلام ف ګوند مشر مولانا فضل الرحمان ويلي، د سپريم کورټ فيصله په جزوي توګه مني، د ګوند په حېث به د فيصلې خلاف د نظرثانۍ خواست نه کوي او کوم غړي یې، چې د دغه فيصلې څخه اغېزمنيږي هغوی به منع نه کړي که د نظرثانۍ اپيل کوي.
د پاکستان الېکشن کمېشن په پینځم مارچ د سني اتحاد کونسل د برخې د قامي او صوبايي اسمبليانو د ښځو او لږکيو مخصوصې څوکۍ په مسلم ليګ ن، پيپلز ګوند، جمعيت علمااسلام ف او عوامي نيشنل ګوند وېشلې وې.
عوامي نېشنل ګوند ويلي، د سپريم کورټ د فيصلې احترام کوي، الېکشن کمېشن په خپلو زمه وارو پوره کولو کې پاتې راغلی خو تحریک انصاف ګوند ته د مخصوصو څوکيو سره هغه خېر هم ورکړل شوی چې غوښتی یې نه وو.