په افغانستان کې د انساني حقونو په صورتحال د متحده قومونو خبرنګار په پنجشیر ولایت کې په ورستي صورتحال تشویش څرګند کړی او ویلي يې دي چې په پنجشیر کې د غیرقانوني وژنو د الزماتو په سمدستي ډول دې تحقیقات وکړی شي.
ریچرډ بېنېنټ د شورو، چهارشنبې، په ورځ په ټوېټر خپل یو پېغام کې وویل چې په پنجشیر کې په بې دریغه ډول غیرقانوني وژنو کې د ککړو خلکو دې احتساب وکړی شي. "زه د نژدې نه د صورتحال څارنه کوم."
د بېنېټ د بیان نه مخکې طالبانو ویلي وو چې په پنجشیر کې د عملیات په مهال يې ګڼ شمېر مخالفین وژلي او ځیني يې نیولي دي.
د طالبانو وياند ذبيح الله مجاهد وي او ای ته ويلي عمليات يې د پنجشیر په دريو ولسواليو کې شروع کړي چې د هغه په قول سیمه د باغيانو نه خالي کړي.
مجاهد وویل “د صفايۍ عمليات په ريکها، دره او ابشار سيمو کې شوي دي او تر اوسه يې 40 باغيان چې پکې څلور کمانډران هم دي وژلي دي. د دې تر څنګ طالبانو د 100 نه زيات مخالفين نيولي هم دي.”
هغه وايي د دوی مجاهدينو د مقاومت کونکو خلاف عمليات دا اونۍ پيل کړي ځکه چې مخالفينو ناوړي کارونه کول او دعوه يې کړې تېره شپه عمليات سر ته رسيدلي او جګړه ختمه شوې ده.
ذبیح الله مجاهد
څېړونکي وايي د طالبانو مخالفې ډلې نيشنل ريزېسټينس فرنټ یا ملي مقاومت جبهې په پنجشير او بغلان کې د طالبانو خلاف وسله وال مقاومت تېز کړی او طالبان غواړي چې مخالفين تر ډېره حده محدود وساتي.
ملي مقاومت چې مشري يې د احمد شاه مسعود ځوی احمد مسعود کوي په نزدې ورځو کې دعوې کړي چې د طالبانو خلاف چاريکي حملې يې په پنجشير کې زياتې کړي.
تر اوسه پورې طالبانو په دوامداره توګه دا خبرونه ردول چې ځای په ځای جګړه دوام لري او د ملي مقاومت جبهې دعوې يې نه يواځې دا چې نه منلې بلکې ويل يې دا جګړه تشه په سوشل ميډيا کې کېږي.
د ملي مقاومت جبهې وياند صبغت الله احمدي په ټوېټر په طالبانو تور لګولی چې د ډلې اته تنه طالبانو نيولي وو او بې عدالته يې وژلي دي.
هغه دا دعوه هم وکړه چې طالبانو دغه تنان د انتقام په ترڅ کې وژلي ځکه چې د مقاومت جبهې طالبانو ته په ګڼ شمېر کې مرګ ژوبله اړولې ده.
د ازادو سرچينو لخوا د دواړو خواو د دعوو په اړه معلوماتو ته لاس رسی نه دی شوی.
یادونه: د دې خبر مخکني معلومات د اسلام اباد نه د وي او ای خبریال ایاز ګل د خبر نه اخیستل شوي وو