د سعودي عرب چارواکي وايي په مکه مکرمه کې د حرم شريف په جمات کې د کار په وخت د يو کرېن غورځېدو په پېښه کې د مړه شوؤ کسانو شمېره ۱۰۷ ته رسېدلې او ۲۳۸ نور ژوبل شوي دي .
د چارواکو په وينا دغه پېښه د حرم شريف په احاطه کې دننه په داسې مهال رامنځته شوې ده چې د کرېن غورځېدو نه وړاندې تېز باران او سيلۍ راغلې وه .
چارواکي وايي د کرېن غورځېدو په مهال د حرم شريف په دغه حصه کې خلک په لويه شمېره کې وو ځکه ډېر زاني زيان رامنځته شوی دی .
د پاکستان د دفتر خارجه وياند قاضي خليل الله وئيلي چې په دغه پېښه کې د کوم پاکستانې د مړينې خبر مخې ته نه دی راغلی او د ۲۲ پورې پاکستاني پکې ژوبل شوي دي .
په سوشل ميډيا باندې د دغې پېښې عکسونه او ويډيوز خپرې کړی شوي چې څنګه کرين غورځېږي او د کرېن لاندې راغلي خلک هم په دغو عکسونو او ويډيوز کې لېدل کيږي .
د سعودي چارواکو په وينا د پېښې نه وروستو د مکې مکرمې ښار په روغتونو کې اېمرجنسي اعلان شوی ده . او راپورونه وايي پېښه کې د مړه شوؤ کسانو د پېژندګلو په اړه تراوسه پورې کوم خبر مخې ته نه دی راغلی .
د مکې ګورنر خالدالفېصل د کرېن غورځېدو د موقعې دوره کړې او وئيلي يې دي د پېښې پلټنې پېل کړی شوي دي .
د حرم شريف جمات کې دغه پېښه په داسې مهال رامنځته شوې چې د ګردې نړۍ نه خلک د حج دپاره راجمع کيږي او راپورونه وايي تراوسه پورې نزدې پينځه لاکه کسان د حج دپاره رارسېدلي ، او د حج تياريانې روانې دي .
د سعودي عرب چارواکو تېر کال د حرم شريف د پراخولو د کار له کبله د حج دپاره راتلونکو کسانو د شمېرې کمولو هم وئيلي ؤ . د ګردې نړۍ نه هرکال خواؤشا د ۲۰ لاکو نه زيات خلک د حج دپاره سعودي عرب ته ځي .
