واشنګټن ــــ د پاکستان د پارلمان غړي او د بشري حقونو د فعال تنظیم پښتون ژغورنې غورځنګ یوه مشر علي وزیر وایي، "د پښتنو پر خاوره امن غواړو" او دا چې "د پاکستان له خاورې د پښتنو د وینو بوی راځي".
د جمعې په ورځ د جنوبي وزیرستان په مرکز واڼه کې یوې سترې ولسي غونډې ته په وینا کې علي وزیر وویل، چې ترهګرۍ پښتانه ډېر ځورولي دي او دوی د پښتنو د راتلونکو نسلونو لپاره امن غواړي:
"موږ د خپلو بچو لپاره په دې خاوره امن او ارام غواړو".
د ده د وینا په وخت د غونډې زرګونو احتجاج کوونکو لاسونه پړکول او د ترهګرۍ په ضد یې شعارونه ورکول.
دا غونډه د پښتون ژغورنې غورځنګ د یوه مشر ارمان لوڼي د وژنې د څلوېښتۍ په مناسبت جوړه شوې وه. دې ته ورته د بلوچستان په ږوب سیمه کې هم نن لویه ولسي غونډه شوې، چې ویناوالو یې د ارمان لوڼي د ایف ای آر د درج کېدو غوښتنه کوله.
د پاکستان پوځ پخپل وروستي دریځ کې ویلي، چې پښتون ژغورنې غورځنګ ته پکار دي له حکومت سره خبرو ته کښېني. پوځ دا هم ویلي چې د پي ټي ایم اکثره غوښتنې منل شوې دي او تر سرې کرښې دې نه اوړي، چې ریاست د دوی په ضد ګام اخیستو ته مجبوره شي.
د امریکې د بشري حقونو په کلني رپوټ کې ویل شوي، چې پاکستاني ادارو د پښتون ژغورنې غورځنګ فعالین ځورولي، وېرولي او نیولي دي خو د دوی په ضد یې له باقاعده تشدده ډډه کړې ده.
د بلوچستان د کورنیو چارو وزیر ضیا لانګو وایي، د ارمان لوڼي د وژنې ایف ای آر به هله درج شي، چې د هغه د پوسټ مارټم بشپړ نتایج مخې ته راشي.
د پښتون ژغورنې غورځنګ مشران وایي، چې په وروستیو کې د دوی دوو غړو حیات پرېغل او ګلالۍ اسماعیل نومونه د سفري بندیزونو له نوملړه ایستل شوي دي، خو د 9 نورو کسانو نومونه لا اوس هم په دغه نوملړ کې پاته دي، چې د منظور پښتین نوم هم پکې شامل دی.
