پاکستان خېبرپښتونخوا صوبې ترټولو لوي عدالت، پېښور هاي کورټ د پوځ د ولقې نه د غیرقانونه 'جماعت الحرار ' ډلې پخواني ویاند احسان الله احسان تښتېدو مقدمه د مشر حکومتي وکیل عدالت ته ددې باور ورکولو وروستو ختمه کړې چې احسان الله احسان ته ورنزدې شوي او ډېر زر به يې بيا ونيسي.
پاکستاني پوځ د ٢٠١٧ د اپرېل په میاشت کې دا خبره منلې وه چې احسان الله احسان د ملک امنیتي ځواکونو ته تسلیم شوی دی او د دوی په ولقه کې دی. خو د روان کال جنورۍ په میاشت کې هغه په یو ویډیو کې ویلي وو چې د پوځ د قید نه تښتېدلی.
د خیبرپښتونخوا سرښار پېښور په آرمي پبلک سکول باندې د کال ۲۰۱۴ دسمبر په میاشت کې شوې ترهګر حمله کې د وژل شوو طالب علمانو مور پلاران احسان الله احسان ددغه حملې لپاره ذمه وار بلي. د پېښور آرمي پبلک سکول ترهګر حملې دوه ورځې وروسته احسان الله احسان میډیا ته ویلي وو چې دغه حمله کې لاس نه لري.
احسان الله احسان په هغه وخت کې د غیرقانونه ډلې تحریک طالبان پاکستان نه جدا شوې ډلې جماعت الاحرار ویاند وو. د پاکستان پوځ د پېښور آرمي پبلک سکول باندې شوې ترهګر حملې لپاره تحریک طالبان پاکستان ذمه وار بلي. د پوځ پخواني وياند جنرال اصف غفور د احسان الله احسان د تسليم کېدو په وخت ويلي وو چې نوموړی د جماعت الاحرار مشر او د ټي ټي پي پخوانی وياند دی.
د پېښور آرمي پبلک سکول په حمله کې د وژل شوي یو ماشوم پلارفضل خان ایډوکیټ وي او ای ډیوه ته ویلي ډپټي اټارني جنرل او ریاستي ادارو د عدالت په وړاندې منلي چې احسان الله احسان ددوي نه تښتېدلی او هغه کسان چې د احسان الله احسان ساتنه يې زمه واري وه او هغه ترې تښتېدلی دغو کسانو ته يې سخته سزا ورکړې ده.
د تحریک طالبان ویاند د نيولو وروسته فضل خان د کال 2017م د مې په مياشت کې پېښور هايکورټ ته درخواست کړی ؤ چې احسان الله احسان ته سزا ورکړي. نوموړي یره لرله چې هسې نه احسان الله احسان ته ریاست معافي ورکړي او خوشی يې کړي.
فضل خان ایډو کیټ ډیوه ته ویلي د طالبانو ویاند دوه نیم کاله د پوځ په قید کې ساتل شوی وو او ډېرو خلکو د هغه دقید ساتلو په طریقه ټکونه هم کړي ؤ چې ګنې هغه د شاهي مېلمه په توګه ساتل کيږي.
فضل خان ایډو کیټ ویلي د دغه مقدمې نوعيت اوس بدل شوی او دوی د راتلونکې دپاره خپله مشوره کوي چې ايا اوس سپريم کورټ ته لاړ شي يا بيا د پېښور هايکورټ ته بل درخواست وکړي.
د روان کال فرورۍ په شپږمه نېټه په سوشل میډیا خپور شوي یو پېغام کې احسان الله احسان د تښتېدو د دعوې سره دا ګواښ هم کړی ؤ چې ډیر زر به د پاکستاني پوځ او د هېواد د استخباراتي ادارو د منصوبو نه پرده لرې کړي.
هغه ويلي ؤ سږ کال د جنورۍ په ١١ نېټه د پاکستان د ولکې نه په وتلو کې بریالی شوی دی.
له دغې ويډيو مخې ته راتلو نزدې دوه اوونۍ وروسته د پاکستان د کورنيو چارو وزير اعجاز شاه د احسان الله احسان د تښتېدو د خبر پخلی کړی ؤ.
