د بلوچستان شېراني په غریيزه سيمه کې د عسکرو پر پوسته بريد کې څلور عسکر وژل شوي اؤ چارواکي د يوه بريد ګر د وژلو دعوه هم کوي.
د ليويز چارواکو په وينا پېښه د بلوچستان او د پښتونخوا صوبې په منځنۍ سيمه دهنه سر کې را منځته شوې.
امنیتي سرچینې وايي نامعلوم وسلوالو د شنبې/خالي او يکشنبې/اتوار په شپه په راکټ لانچرو او نورو وسلو د پوليس او ايف سي ځواک پر پوستو بريد کړی چې په کې درې د پوليس عسکر او يو د ايف سي عسکر وژل شوی دی.
د ليويز چارواکو په وينا، د بلوچستان او خېبر پښتونخوا صوبې تر ميان دغځېدلي لوی سړک پر غاړه د پوليس او ايف سي ځواک پوستې څنګ پر څنګ جوړې دي.
برید کې د وژل شوؤ عسکرو پیژندګلو د پوليس سب انسپکټر بهادر خان، سپاهي افضل خان، او سپاهي بازخان په نومونو شوې ده.
سرچبنز وايي د ايف سي ځواک د وژل شوي عسکر تعلق د بلوچستان له خضدار سيمې سره و چې د هغه مړی يې د هغه کلي ته لېږلی دی.
د بلوچستان وزير اعلی مير عبدالقدوس بزنجو او د کورنيو چارو وزيرمير ضيا لانګو دا پېښه پېښه غندلې ده.
په جاري کړل شوي سرکاري خبر کې ويل شوي چې ترهګرو د سيمې امن خرابول غواړي خو پاکستاني ځواکونه دا توان لري چې هر ډول ترهګر پر شا وتمبوي او د سيمې امنيت خوندي کړي.
د سيمې د خبريالانو په خبره د يادې پېښې پر ضد داغېزمنو کورنيو غړو او سياسي فعالانو د وژل شوو له جسدونو سره د ماڼې خواه په سيمه احتجاج پېل کړی دی.
پر ټولنيزو رسنيو د احتجاج ويډيوګانې خپرې شوي چې په کې ويناوال له حکومت څخه غوښتنه کوي چې د پېښې په اړه دې ازاد تحقيقات وشي او په پېښه کې دې د ککړو خلکو پر ضد مقدمه درج کړل شي.
"شېراني پر امن سيمه ده، دلته څنګه څوک راځي او داسې پېښې کوي د دې پوښتنه له حکومت څخه کوو، دا څوک وو او له کومه راغله، تر هغه به مو احتجاج روان وي چې تر څو موږ ته د پېښې رښتنی حال را نه کړل شي."
ياده پېښه په داسې وخت کې شوې چې د شېراني او ژوب د سېلګرۍ په سيمه سليازي کې د لوی اختر مېلې روانې دي.
په دې مېلو کې د بلوچستان او د خېبر پښتونخوا له بېلا بېلو سيمو څخه په زرګونه خلک برخه اخلي.
