باجوړ: قامي مشر ملک جهانزیب په هدفي برید کې وژل شوی دی

امنیتي سرچینې وایي له افغانستان سره ډیورنډ کرښې ته څېرمه د خېبر پښتونخوا قبایلي ضلعه باجوړ کې یو قامي مشر ملک جهانزیب د نامعلومو وسله والو له لوري په هدفي برید کې وژل شوی دی.

د خالي- شنبې په ورځ د سیمې نه امینتي سرچینو وي او ای ډیوه ته ویلي په ملک جهانزیب د باجوړ خار بازار کې نامعلومو کسانو ډزې کړي چې پکې هغه وژل شوی اؤ برید کوونکي له موقعې تېښتېدلي دي.

د باجوړ د دامان شاه علیزئ سیمې دقامي مشر ملک جهانزیب کشر ورور مولانا عزیز الله هم څو میاشتې وړاندې په خار بازار باجوړ کې د نامعلومو وسله والو په برید کې وژل شوی ؤ چې وروسته بیا ددغه برید ذمه واري وسله والې ډلې داعش پغاړه اخستې وه.

په ملک جهانزیب د شوي برید ذمه واري په سمدستي توګه چا نه ده قبوله کړې.

وي او ای ډیوه ددې پېښې په اړوند د پولیسو د نظر اخستو په غرض د ټیلي فون اؤ واټسف له لارې د باجوړ د پولیسو ضلعي مشر یا ډي پي او نزیر خان سره د تماس نیولو هڅه وکړه خو دهغه موبایل فون هیڅ ځواب نه ویلو.

مطبوعاتي رپورټونه وایي وسله واله ډله داعش دا مهال د افغانستان سره په پوله پرته د پښتونخوا قبایلي ضلع باجوړ کې زیاته فعاله ده اؤ وخت په وخت دغلته په امنیتي ځواکونو، سیاسي اؤ قامي مشرانو د بریدونو ذمه وارۍ هم پر غاړه اخلي.

د روانې میاشتې په څلورمه نېټه هم دباجوړ په عنایت کلي بازار کې نامعلومو وسله والو په دریوؤ کسانو ناتاره ډزې کړې وې چې په کې د عنایت کلي اوسیدونکی سیمع الله د اکبر سید زوي اؤ دماموند تحصیل د بډالۍ اوسیدونکی داود شاه د ګلاب جان زوي وژل شوي اؤ د ناوه ګۍ اوسیدونکی طیب خان سخت ژوبل شوی ؤ.ددغه برید ذمه واري هم وسله والې ډلې داعش منلې وه.

تر دې وړاندې په 30 جولایي هم په باجوړ کې د جمعیت علماء اسلام ګوند په یوه غونډه کې ځانمرګي برید شوی ؤ چې 67 کسان پکې وژل شوي اؤ تر 100 زیات نور ژوبل شوي وؤ. ددغه ځانمرګي برید ذمه واري هم داعش پر غاړه اخستې وه.

همدا شان د جون په 24مه هم د باجوړ په عنایت کلي کې د وسله والو په یو برید کې دمذهبي ګوند جمعیت علماء اسلام یو غړی مولانا نور محمد اؤ دهغه ورور زبېر وژل شوي وؤ اؤ د قاري سراج په نوم یو بل تن سخت ژوبل شوی ؤ چې ذمه واري یې داعش پغاړه اخستې وه.

د جون په میاشت کې پوځ دعوه کړې وه چې د باجوړ په عنایت قلعه سیمه کې یې په عملیاتو کې د داعش د یو مهم کمانډر شفيع په ګډون "درې ترهګر وژلي"دي

پاکستان کې د یوې غیر دولتي څېړنیزې ادارې پاکستان انستيټیوټ فار کنفلکټ اینډ سیکورټي سټديز رپورټ وایي سږ کال داګست په میاشت کښې په ګرد هیواد کښې د ترهه ګرۍ 99 پیښې رپورټ شوې دي چې دا د 2014م نه راپدېخوا په یوه میاشت کښې تر تولو زیاتې پېښې دي.

دغه رپورټ وایي د اګست په میاشت کښې شوو د ترهه ګرۍ پیښو کښې په ګرد هیواد کې 112 تنه وژل شوې دي اؤ د جولايي میاشتې په مقابله کې په اګست کې ترهه ګري 93 فیصدي زیاته شوې ده.

رپورټ وايي بلوچستان اؤ دخیبر پښتونخوا قبایلي ضلعې د اګست په میاشت کې د ترهه ګرۍ نه تر ټولو زیاتې اغیز منې شوې دي اؤ بلوچستان صوبه کې د تیرې میاشتې په مقابله کې ترهه ګري 65 فیصدي اؤ دپښتونخوا قبایلي ضلعو کښې 106 فیصدي سیوا شوې ده.