پاکستان د کرکټ نړیوال کپ سیالۍ کې نیدرلېنډز ته ماتې ورکړه

د پاکستان کرکټ لوبډلې د کرکټ نړیوال کپ په خپله لومړۍ سیالۍ کې د نېدرلېنډز لوبډلې ته په ۸۱ رنزونو سره ماتې ورکړه.

د هند حېدرآباد ښار کې شوې د 50 اوورونو په لوبه کې پاکستان په اولني بېټنګ کې په 49 اوورونو کې د ټولو لوبغاړو په سوزېدو 286 رنزونه جوړ کړل. د نېدرلېنډز لوبډلې په ځواب کې په 41 اوورونو کې د ټولو لوبغاړو په آووټ کېدو ۲۰۵ رنزونه جوړ کړل.

د پاکستان له اړخه سعود شکیل او محمد رضوان 68، 68 رنزونه جوړ کړل او باولر حارث رووف په 43 رنزونو 3 لوبغاړي آووټ کړل.

د دې سیالۍ پچه نیدرلېنډز ګټلې وه اؤ پاکستان ته یې وړومبی د بیټنګ کولو بلنه ورکړې وه. په وړومبي سر کې د پاکستان فخر زمان اؤ امام الحق بیټنګ ته را ووتل خو فخر زمان په دریم اوور کې د 12 منډو په جوړولو وسوځېدو.

له فخر زمان وروسته دپاکستان کپتان بابراعظم بیټنګ ته را ووتلو خو هغه هم د وکټ مخې ته زیات ټینګ نه شو اؤ دپینځوؤ منډو په جوړولو په کیچ وسوځېدو.

امام الحق هم 15 منډې جوړې کړې اؤ په کیچ اوټ شو.

تر دې وروسته چې کله محمد رضوان اؤ سعود شکیل لوبې ته را ووتل نو هغوي د پاکستان منډې پرمخ یوړې اؤ تر 100 یې واړولې.

سعود شکیل په دې لوبه کې په 32 بالونو 50 منډې جوړې کړې چې دا یې د یو ورځني کرکټ په کیرییر کې دویمه پینځوسیزه ده .

هغه د خپل بیټنګ په مهال اووه څلوریزي اؤ یوه شپږیزه هم جوړه کړه.

همدا شان محمد رضوان د شپږو څلوریزو په مرسته 50 منډې جوړې کړی خو د لوبې په 29م اوور کې سعود شکیل په 68 منډو وسوځېدو اؤ اؤ تر هغې وروسته په 182 منډو د پاکستان پینځم لوبغاړی هم وسوځېدو.

محمد رضوان په ټولو 75 بالونو 68 منډې جوړې کړې اؤ وسوځېدو اؤ تر هغې وروسته بیا محمد افتخار په 9 اؤ شاداب خان په 32 منډو وسوځېدو.

نواز 39، حارث رؤف 16 منډې جوړې کړې خو حسن علي بیا یوه منډه هم جوړه نه کړی شوه.

دنېدر لېنډ له لوري باس ډي‌لیډز څلور، کولن ایکرمین دوه، وین بیک، پال وین میکرین اؤ ارین دت یو یو لوبغاړی وسوځولو.