شهباز شريف: بشري قاچاق کې د ککړو ډلو پرضد دې سخته کارروايي وشي

د پاکستان وزیراعظم شهباز شريف ويلي، بشري قاچاق کې د ککړو سرکاري چارواکو ضد پورته کړل شوي اقدامات د ستاينې وړ دي، او بشري قاچاق، انساني سمګلنګ کې د ککړو ټولو ډلو ضد یې د سختو قانوني کارروايانو او د عبرت نخښه جوړولو حکم کړی دی.

تېره میاشت په يونان کې يوه کښتۍ ډوبه شوې، د پاکستانيانو پشمول پکې ګڼ کسان مړه شوي وو.

د پاکستان سرکاري خبري ادارې (اې پي پي) ترمخه پرون په شپږم دسمبر د وزیراعظم په مشرۍ د بشري قاچاق ضد پورته کړل شوو اقداماتو د جاج اخستو غونډه شوې ده.

شهباز شریف لارښوونه کړې، په دغه عمل کې د ککړو سهولت کارو ضد دې قانوني چلند وشي او سختې سزاګانې دې ورته ورکړل شي، او بهر چې څوک هم په دغه کار کې ککړ دي، د بهرنيو چارو د وزارت د لارې دې هغوی هم پاکستان ته راوستل شي.

نوموړي د اطلاعاتو وزارت ته لارښوونه کړې چې د کورنيو چارو د وزارت په مرسته دې بهرنيو هيوادونو ته په نوکرو پسې تلونکو خلکو ته د پوهاوي کمپاين وچلول شي چې په غېرقانوني لارو نه ځي.

د 13م او 14م دسمبر په مینځنۍ شپه کې د يونان سره نزدې کښتۍ اوښتې، په مړه شوو او ورکو کسانو کې د ډېرو تعلق د پاکستان سره ښودل شوی دی.

د پېښې نه څلور ورځې وروسته په يونان کې د پاکستان سفارتخانې تاييد کړې، د ژغورنې عمليات ودرول شوي او اوس په سمندر کې د چا د ژوندي پاتې کېدو امېد نه دی پاتې.

کښتۍ کې د ټولو کسانو د کره شمېرې په اړه هغه وخت څه نه وو ويل شوي، خو ژوندي پاتې شوو کسانو ويلي وو، د 35 نه تر 40 پورې کسان مړه شوي دي.

پاکستان کې په بشري قاچاق کې د سرکاري افسرانو د ککړتیا ويل شوي او د هغو پرضد د اقداماتو اخستو هم ويل شوي وو، د پاکستان په پنجاب صوبه کې د انساني قاچاقبرو پرضد مقدمې درج کړل شوې او چارواکو د ځينو د نيولو دعوې کړې وې.

ملګري ملتونه بشري قاچاق د بنيادي بشري حقونو سخته سرغړونه بولي.

په 2015 او 2016 کلونو کې یونان د منځني ختیځ، افریقا او اسیا څخه راتلونکو کډوالو او پناه غوښتونکو لپاره اروپا ته د ننوتلو تر ټولو د خوښې لاره وه او شاوخوا لس لکه خلک د دې هیواد په جزیزو کوز شوي وو.

په کال 2023م کې د یونان سره نزدې په بحیره روم کې یوه کښتۍ چپه شوې وه چې د 400 نه د زیاتو پاکستانیانو په ګډون پکې نزدې 800 کډوال سواره وو د هغوي له جملې څخه یوازې 104 کسان ژوندي ژغورل شوي وو.