د وایټ هاوس چارواکو خبریالانو ته ویلي چې صدر ډونالډ ټرمپ د زیارت/پنجشنبې په ورځ د مصنوعي ذهانت (اې آی) په اړه یو صدارتي حکم لاسلیک کړ چې عنوان یې، "امریکا په مصنوعي ذهانت کې د دنیا مرکز جوړول" دی.
په حکم کې راغلي چې په یو سل او اتیا (۱۸۰) ورځو کې دننه دننه دې د آرټېفېشل انټېلېجنټس اېکشن دپاره یوه تګلاره جوړه کړی شي چې په بنیاد یې " د انساني خوشحالۍ، اقتصادي مقابلې، او قامي سلامتیا فروغ ورکولو دپاره، د نړۍ په کچه د مصنوعي ذهانت په برخه کې د امریکې بالادستي وساتل شي او وسعت ورکړی شي."
ټرمپ همدا شان د مصنوعي ذهانت په برخه کې خپل سلاکار او د قامي سلامتیا مرستیال ته وویل چې د مخکېني صدر جو بایډن لخوا د لګولو شوو پالیسیو او ضابطو په لېرې کولو دې کار وکړي.
ټرمپ د ګل/دوشنبې په ورځ د ۲۰۲۳ کال یو صدارتي حکم چې بایډن جاري کړی و، منسوخه کړ. د هغه منسوخ شوي حکم مقصد صارفینو، کارکوونکو او قامي سلامتیا ته د مصنوعي ذهانت لخوا د ممکنه خطرو کمول و.
ټرمپ همدا شان یو بل صدارتي حکم لاسلیک کړ چې وایي د کرېپټوکرنسۍ یوه کاري ډله دې جوړه کړی شي او د ډیجیټلي سرمایو او د کرېپټوکرنسۍ د ذخیرې جوړلو لارو چارو لټولو دپاره دې د ضابطو یو نوی چوکاټ وړاندې کړي.
په دې اقدام کې چې د وړاندې نه یې توقع کېدله، دا حکم هم شوی چې د کرېپټو کمپنیو دپاره دې بنکي خدمات محفوظه وي. همدا شان د مرکزي بنک لخوا د ډیجیټلي کرنسۍ جوړول چې د موجوده کرېپټوکرنسیو سره مقابله وکړي، منعه ګرځول شوي دي.
دا حکم د ټرمپ د هغو وعدو عملي کېدل دي چې د کمپېن په وخت یې ویلي و یو "کرېپټو صدر به وي او د ډیجیټلي سرمایو د رواج کولو هڅه به وکړي."
دا د مخکیني صدر جو بایډن د ضابط سازانو سره سخت فرق لري، ځکه هغوی په دې خاطر چې امریکاییان د دوکه کېدو یا فراډ او د مني لانډرېڼګ یا ناجایزه پېسو د سپینولو نه محفوظه وساتي، د کرېپټو کرنسۍ د کمپنیو خلاف اقدامات یې کول، او د کوین بېس، بېنانس، کراکېن، او لسهاوو نورې اېکسچنج کمپنیو مالکین یې فېډرل عدالتونو ته کش کړل او دعوه یې کوله چې دوی د امریکې قوانین مات کړي دي.
په یو جدا ګام کې، صدر ټرمپ د زیارت/پنجشنبې په ورځ د وایټ هاوس په اوول آفېس یا صدارتي دفتر کې د هغو درویشتو (۲۳) کسانو د معافۍ صدارتي حکمونه لاسلیک کړل چې د اسقاط حمل په ضد مظاهرو کې یې برخه اخېستې وه.
ټرمپ دا کسان یوه ورځ وړاندې تر دې معاف کړل چې ټاکل شوې ده د اسقاط حمل ضد مظاهره کوونکي پایتخت واشنګټن ډي سي کې راغونډ شي او د "ژوند دپاره مارچ" په نوم کلني لاریون کې برخه واخلي.
Forum