د طالبانو د حکومت د بهرنیو چارو وزارت وايي چې د ایران د بهرنیو چارو د وزیر سید عباس عراقچي په مشرۍ یو پلاوي د طالبانو د حکومت د چارواکو سره د خبرو لپاره د یکشنبې په ورځ کابل ته سفر کړی دی.
د دغه وزارت مرستیال ویاند ضیا احمد تکل د یکشنبې په ورځ جنورۍ ۲۶ (سلواغې اووم) د ایکس په ټولنیزه شبکه کې کابل ته د سید عباس عراقچي د سفر په اړه ویلي چې کابل ته د رسیدو سره سم د طالبانو د حکومت د بهرنیو چارو له وزیر سره یې په یوه دواړخیزه غونډه کې برخه اخیستې ده.
هغه ویلي: "د ایران اسلامي جمهوریت د بهرنیو چارو وزیر ښاغلی سید عباس عراقچي د یوه پلاوي په مشري کابل ته راورسېد او د هیواد (طالبانو حکومت] د بهرنیو چارو وزیر محترم مولوي امیرخان متقي لوري د وزارت په مقر کې استقبال او تر منځ یې دوه اړخیزه ناسته پیل شوه".
په کابل کې د ایران سفارت هم د ایکس په ټولنیزه شبکه کې پر خپله پاڼه کابل ته د سید عباس عراقچي د رسیدو خبر خپور کړی دی.
تر اوسه ددغه سفر د هدف په اړه دواړو خواو خواو رسنیو ته څه نه دي ویلي، خو دمخه د طالبانو د حکومت د بهرنیو چارو په وزارت کې د درېیمې سیاسي څانګې مدیر ذاکر جلالي کابل ته ددغه سفر په اړه د ایکس پر خپله پاڼه کابل ته د عراقچي سفر د دواړو هیوادونو ترمنځ اړیکو کې یو رغنده ګام بللی وو.
ذاکر جلالي لیکلي: "د افغانستان او ایران ترمنځ ګډې سیاسي، اقتصادي او امنیتي ګټې د دواړوخیزو همکاریو د پیاوړي کیدو لپاره یو فرصت دی. کابل ته د ایران د بهرنیو چارو د وزیر سید عباس عراقچي نږدې سفر د اړیکو د پیاوړي کیدو په برخه کې یو رغنده ګام دی، چې کولای شي د دوو هیوادونو ترمنځ اړیکې نوي پړاو ته داخلې کړي".
ځینو ایراني رسنیو افغانستان ته د سید عباس عراقچي د سفر په اړه د ایراني سرچینو له قوله ویلي چې ټاکل شوې ددغه یو ورځیني سفر په ترڅ کې به د دواو خواو ترمنځ د علاقې وړ مسایلو پر سر د خبرو ترڅنګ د دواړو هیوادونو ترمنځ د شتو ستونزو په سر هم خبرې وشي.
دغو راپورونو کې ویل شوي چې د ایران د بهرنیو چارو د وزیر په مشرۍ په دې پلاوي کې به ددغه هیواد د یو شمیر وزارتونو د استازو سربیره د ایراني سوداګرو استازي هم برخه ولري.
ایراني چارواکو په دې وروستیو میاشتو کې په پرله پسې ډول د هلمند د سیند په اوبو کې د خپلې ونډې د رسیدو څخه شکایتونه کړي او د طالبانو له حکومت یې ددغو اوبو څخه د خپلې بشبړې ونډې د ترلاسه کولو غوشتنې کړي دي. همداشان ایراني حکومتي چارواکو له دغه هیواد څخه د افغان کډوالو د ایستلو مسلې یادونه هم کړې ده او هم یې له افغانستان څخه ایران ته د نشه يي توکو د قاچاق په دوام هم په پرله پسې ډول اندیښنه ښودلې ده.
دا د ایران د بهرنیو چارو د وزیر په توګه د ټاکنې وروسته افغانستان ته د سید عباس عراقچي لومړی سفر دی. د ایران بهرنیو چارو وزیر د روان ۱۴۰۳ کال د لیندۍ د میاشتې په سر کې علي رضا بیګدلي افغانستان لپاره د نوی سفیر په توګه ګمارلی وو.
ددې دمخه حسن کاظمي قمي په افغانستان کې د ایران سفیر او د افغانستان لپاره د ایران د جمهور رئیس ځانګړی استازی و. قمي په ۱۳۸۰ او ۱۳۸۱ کالونو کې په هرات کې د ایران سر کونسل په توګه هم کار کړی و.
ایران د ۲۰۲۱ کال د اګست په میاشت کې په افغانستان کې واک ته د طالبانو د بیا رسیدلو وروسته نه یوازې د دغې ډلې د حکومت سره خپلې اړیکې نږدې ساتلي دي، بلکې په کابل کې د خپل سفارت د پرانیستي پریښودو ترڅنګ په ایران کې د افغانستان سفارت او د قونسلګریو چارې هم د طالبانو له خوا ګمارل شویو دپلونماتانو ته سپارلي دي.
خو د نورو هیوادونو په څیر یې د طالبانو حکومت په رسمیت نه دی پیژندلی. ایران اوس مهال د افغانستان یو له سترو اقتصادي شریکانو څخه دی، چې د دواړو هیوادونو ترمنځ د سوداګرۍ د راکړې ورکړې کچه یې له دوو میلیارد ډالرو څخه اوړي.
د طالبانو د حکومت د صنعت او سوداګرۍ وزارت د ویاند عبدالسلام جواد د معلوماتو له مخې افغانستان د تیر ۲۰۲۴ کال په لومړیو نهه میاشتو کې ایران سره د ۲ میلیاردو او ۱۹۴ میلیونو ډالرو راکړه ورکړه لرله چې ددې شمیر یوازې ۳۸ میلیونه ډالر یې صادرات او پاتې دوه میلیارده او ۱۵۶ میلیونه یې واردات وو.
د وي او ای اشنا په مننه.
Forum