امریکا کې د کرونا وایرس خوریدو مخنیوي لپاره سان فرانسسکو ښار تړلو امر شوی
د امریکا په کېلیفورنیا ایالت کې د کرونا وایرس خوریدو مخنیوي لپاره په سان فرانسسکو او خوا و شا سیمو کې اوسیدونکو نزدې ووه میلینه (۷۰ لکه) خلکو ته امر شوی چې ځانونه خوندي کړي. دا په امریکا کې د کرونا وایرس د خوریدو لپاره د حکومت لخوا تر ټولو سخت اقدام دی.
د سان فرانسسکو ښاروال لنډن بریډ نن د ګل په ورځ د دغه اعلان په وخت ویلي ٫٫ مونږ خبر یو چې دا ګامونه به د عامو خلکو ژوند ګډ وډ کړي، خو دا ټول مهم دي.٬٬ نوموړي زیاته کړې ٫٫ دا زمونږ د ښار لپاره یو سخت وخت دی او دا زمونږ ذمه واري ده چې ټول د خپلو ځانونو او ګاونډیانو د خوندي ساتلو کې خپله ذمه واري ترسره کړو. که ډیره ضروري نه وي د کورونو نه بهر مه ووځۍ چې د کرونا وایرس خوریدو مخه ونیول شي.٬٬
د دغه امر سره نه یواځې سان فرانسسکو ښار د دغه خوا و شا شپږ کاونټیانې (ولسوالۍ/ تحصیلونه) هم د اثر لاندې راغلي. د سود سودا او د دوایانو د دکانونو نه علاوه به نور ټول بازارونه او هوټلې تړلې وی.
د سان فرانسسکو ښار د پولیسو مشر ویلیم سکاټ په دغه مهال ویلي د حکومت لخوا اعلان شوي دغه ګامونو عملي کولو لپاره به پولیس افسران پرځاې وي. د سان فرانسسکو ښار او شپږو نورو ولسوالیو بندیدل به د اپریل میاشتې ۷مې نېټې پورې وي.
کېنېډا د امریکایانو علاوه د نورو خلکو لپاره خپلې پولې وتړلې
د کېنېډا وزیراعظم جسټن ټروډو د ګل / دوشنبې په ورځ اعلان کړی د کېنېډايي وګړو او امریکایانو پرته به د نور هر چا لپاره خپلې پولې تړي. وزیراعظم په ټولو کېنېډايي وګړو غږ کړی چې د کرونا وایرس د خوریدو مخنیوي لپاره دې په خپلو کورونو کې پاتې شي.
جسټن ټروډو په خپله هم ځان وروسته د هغې قرنطین کړی کله چې تیره اونۍ د هغه په میرمن کې د کرونا وایرس پخلی وشو. نن د خپل کور بهر د میډیا سره د خبرو په وخت نوموړي ویلي ٫٫ ټول کینېډايان دې تر خپله وسه په کورونو کې پاتې شي.٬٬
نوموړي ویلي حکومت یې دغه فیصله د ساېنس او د ولسي صحت په اړه د وړاندیزونو وروسته کړې. نوموړي زیاته کړې که څه هم په امریکا کې د کرونا ناروغانو پېښې په زیاتیدو دي په امریکایانو به کېنېډا ته د راتګ بندیز نه وي. نوموړي په دغه مهال د امریکا او د کېنېډا د اقتصاد یادونه هم کړې ده.
امریکا د کېنېډا ټر ټولو لوې تجارتي ملګری هیواد دی او د کېنېډا د صادراتو ۷۴ سلنه د امریکا نه پوره کیږي. د کېنېډا وزیراعظم په نژدیو وروځو کې د امریکا د صدر ډانلډ ټرمپ سره هم خبرې کړي.
د کېنېډا وزیراعظم وړاندې ویلي حکومت به یې د هیواد څلورو لویو اېیرپورټونو یا هوايي ډګرونو باندې د الوتکو راتګ محدودوي. د کېنېډا حکومت په ټولو هوايي کمپنیو دا کار لازموي چې د ټولو مساپرو جهازونو ته د ختلو وړاندې دې د دوي طبعې معاینه کوي.
جسټن ټروډو ویلي هیواد یې دغه سخت ګامونه د دې لپاره پورته کوي چې په کېنېډا کې ټول خلک خوندي وساتل شي.
پاکستان کې د کرونا وایرس خوریدو مخنیوي لپاره کوم حکومتي ګامونه پورته شوي؟
د جمعې په ورځ د پاکستان حکومت په هیواد کې د کرونا وایرس خوریدو مخنیوي لپاره په ټول هیواد کې د تعلیمي ادارو د تړلو اعلان کړی. د دغې تر څنګ ټول نړیوال هوايي سفرونه محدود کړل شوي، د ودونو په دستورو، سنیماګانو او د خلکو په لویو ګڼو ګوڼو پابندي لګول شوې.
د ګل په ورځ اسلام اباد کې د بیجنګ سفیر یاو جنګ د چین سرکاري میډیا ته ویلي چین د کرونا وایرس د مخنیوي لپاره پاکستان ته ۱۲۰۰۰ د ازموینې یا ټسټ کټونه، ۳ لکه تربوزکونه یا ماسکونه او د کرونا پرضد ځانګړې جامې ورکړي. د دغې تر څنګ چین پاکستان ته د عارضي هسپتالونو جوړولو لپاره ۴ میلینه ډالره هم ورکړي.
چین په تیرو پینځه کلونو کې په پاکستان کې د بیلینونو ډالرو سرمایه کاري کړې چې تر مخه يې په پاکستان کې سړکونه، بندرونه او د توانایۍ پلانټونه لګول شوي. او د دغې مقصد لپاره پاکستان ته په زرګونو چینايان هم کارونه له تللي.
د پاکستان سند ایالت کې د کرونا ناروغانو شمیره ۱۵۰ او خېبر پښتونخوا کې ۱۵ ته ورسیدله
د پاکستاني مطبوعاتو تر مخه په پاکستان کې د کرونا ناروغانو شمیره تیره شپه ۱۸۴ ته رسیدلې. د پاکستان د انګریزۍ ژبې ورځپاڼې ډان تر مخه په دغو کې تر ټولو زیاتې د پاکستان سند ایالت کې رپورټ شوي دي.
د سند ایالت وروسته په خېبر پښتونخوا کې د چارواکو په وینا ۱۵، په بلوچستان کې ۱۰،ګلګت بلتستان کې ۵، او د ابادۍ په لحاۍ تر ټولو لوې صوبې پنجاب او اسلام اباد کې ۲-۲ پېښې رپورټ شوي.
د پاکستان سند ایالتي حکومت ویاند مرتضا وهاب تیره شپه ناوخته په خپل ټوېټر په سند ایالت کې دذ ۱۴۶ پېښو پخلی کړی. نوموړي په ټوېټر لیکلي چې په دغه ۱۶۴ کې ۱۱۹ هغه شیعه زایرین دي چې د ایران نه راستانه شوي. نوموړي وړاندې ویلي: ٫٫ دغه ۱۱۹ شیعه زایرین دا مهال په سکهر کې ساتل شوي. پاتې نورو کې ۲۶ په کراچۍ او یو په حیدر اباد کې دی.٬٬
په پاکستان کې د کرونا وایرس په ناروغانو کې زیات تره هغه خلک دي چې د ایران نه راستانه شوي. پاکستان کې د کرونا وبا خوریدو په سر د صحت قامي اډاڼې یا نظام په اړه اندېښنې هم سېوا شوي.