د پاکستان پوځ وایي د پښتونخوا د قبایلي ضلعې خېبر په تیراه سیمه کې د اوو ورځو راهسې په روانو عملیاتو کې څلور پوځيان وژل شوي اؤ د ۲۵ؤ وسله والو د وژلو دعوه یې هم کړې ده.
پوځ د افغانستان د پولې تر څنګ په عملیاتو کې د څلورو عسکرو اؤ ۲۵ وسله والو د وژل کېدو دا خبر وورسته له هغې جاري کړی چې وړمه ورځ په ناکراره بلوچستان کې د وسله والو ډلو په پرله پسې بریدونو کې د ۱۴ پوځيانو او امنيتي اهلکارو په ګډون د ۷۰ نه د زياتو کسانو د وژل کېدو رپورټونه مخې ته راغلل.
د پوځ ویاندې ادارې آي ایس پي آر د نهې - سه شنبې په ورځ په خپل بیان کې ویلي چې امنیتي ځواکونو د خېبر په تیراه سیمه کې د وسله والو ډلو لښکر اسلام اؤ جماعت الاحرار په ګډون د استخباراتي معلوماتو په اساس په پراخه کچه عملیات کړي دي.
پوځ دعوه کړې ده چې په دغو عملیاتو کې یې وسله والو ډلو اؤ د هغوي ملاتړو ته درانه زیانونه اړولي دي.
پوځ ویلي دا عملیات له ۲۰م اګست راهسې په سیمه کې پيل کړل شوي چې پکې څلور امنیتي عسکر وژل شوي دي.
د پوځ بیان کې دعوه شوې ده چې په عملیاتو کې د وسله والو د سر مشر ابوذر عرف صدام په ګډون ۲۵ وسله وال وژل شوي دي.
پوځ پخپل بیان کې دغه وسله وال د "خوارجو" په نوم یاد کړي دي خو په پاکستان کې د پوځ په ضد فعاله وسله واله ډله ټي ټي پي د ځان لپاره د "خوارج" کلمه نه کاروي او اکثره وايي د پاکستان د پوځ پر ضد جګړه یې “جهاد” دی.
پوځ ویلي په دغو عملیاتو کې د ۲۵ وسله والو د وژل کېدو تر څنګ ۱۱ نور ژوبل شوي هم دي خو د وژل شوؤ اؤ ژوبل شوؤ وسله والو پېژندنه یې د وسله وال کمانډر ابوذر پرته بیا پخپل بیان کې مخې ته نه ده راوړې .
د اي ایس پي آر په بیان کې ویل شوي چې په دغو عملیاتو کې وسله والو ته اوښتي درانه زیانونه د امنیتي ځواکونو د عزم اؤ د ترهګرۍ ختمولو د هوډ ثبوت دی.
په دې وروستیو کې د پاکستان په بلوچستان اؤ خېبر پښتونخوا صوبو کې د ترهګرۍ پېښې اؤ په امنیتي ځواکونو د بریدونو لړۍ زیاته چټک شوې ده.
وړمه ورځ په ناکراره صوبه بلوچستان کې په بېلابيلو وسله والو بريدونو کې د ۱۴ پوځيانو او امنيتي اهلکارو په ګډون د ۷۰ نه زيات کسان وژل شوي وؤ. حکومت ویلي وؤ چې حمله کوونکو ته به سخت ځواب ورکولی شي.
په هغه ورځ هم پوځ په بلوچستان کې د ۲۱ ترهګرو د وژلو دعوه کړې وه.
څېړونکي وایي په بلوچستان او خېبر پښتونخوا کې د ګل- دوشنبې ورځ خونړۍ وه او پکار ده د پاکستان واکداران هغه حقیقت ته سترګې پرانیزي چې د دغو دواړو صوبو امن خوښوونکي او جمهوري ډلې یې د احتجاجونو او د خپلو مبارزو د لارې ریاست ته ښودل غواړي.
دوی زیاتوي چې په یادو دواړو صوبو کې بد امنۍ او ترهګرۍ ستونزہ د لسیزو زړہ دہ او پکار دہ چې ریاست د یادو صوبو په حقله د خپلو تګلارو ریښتینی او صادقانه جاج واخلي.
د ترھګرۍ په چارو نظر لرونکی څېړونکی او د پېښور پوهنتون د جرنلزم استاد ډاکټر سېد عرفان اشرف وایي "بلوچستان او پښتونخوا کې د ترھګرو خلاف د ریاست د لسېزو جګړې ډیرې موثرې نه دي پاتې شوي او پکار دہ چې ریاست خپلو کمیو او کوتاهیو [غلطیو] ته پام وکړي".
د ډیوه خبریال عثمان خان ته سېد عرفان اشرف ویلي دا اوس چې کومه مسلہ روانه دہ ددې خالصتاً د پاکستان د پالیسیو سرہ زیات تعلق دی او وایي د دې ذمه وارۍ په ریاست او د ریاست پہ مشینرۍ زیات اچول سم دي.
دهغه په خبره "زہ دا نه ویل غواړم چې دې کې به بهرني طاقتونه نه وي، خو چې مونږ پخپله هم نورو معاملو کې ککړ یو کوم څیزونه چې پخپله کوو د پالیسیو د لاندې مونږ دا نه شو ویلی چې نور قوتونه به هغه نه کوي د پاکستان خلاف، هم دغه وجه دہ چې همیشه مونږ وایو ریاست دې هغه ذمه واري قبوله کړي چې خپل خلک دې د ځان کړي د خپلو خلکو حقونه دې هغوي ته ورکړي"
د پاکستان وزیراعظم شهباز شریف د بلوچستان له بریدونو وروسته ویلي وؤ ” پاکستان دا وخت کمزوري نه شي ښودلی او دا ترھګرو ته د ماتې ورکولو وخت دی“.
ښاغلي شریف زیاته کړې وه چې”په بلوچستان کې هغه خلک چې پاکستانی سوچ لري هغه خلک چې د پاکستان آیین او بیرغ مني زہ دا ګڼم د هغوی سرہ د خبرو اترو دروازې به هر وخت پرانېستي وي خو څوک چې په دوی کې د دوست پہ جامه کې دښمنان دي هغوی سرہ نه څه قسمه خبرې اترې کېدای شي او نه ورسرہ نرمه رویه ساتل کېدای شي“.
Forum