د پښتو ژبې د ورځپاڼې باني او اعلا مدير پیر سفید شاه همدرد د اوږدې ناروغۍ ورستو د نومبر په 24 مه نیټه په حق رسیدلی.
وحدت اخبار د ښاغلي همدرد د مړيني خبر ورکړی او لیکي هغه د ډېرې مودې ناروغه ؤ او د تېرو درې هفتو راهسې په هسپتال کې ؤ.
د پاکستان د اخباري مديرانو شورا سي پي این اي د پیر سفید شاه همدرد په مړينه د غمرازۍ څرګندونې کړي. د شورا مشران وايي هغه د پښتونخوا یو لوړ رتبه شخصیت ؤ.
په پاکستان کې د افغانستان پخواني سفیر حضرت عمر زاخېلوال هم په خپله ټويټر پاڼه د هغه په مرګ خواشينې ښودلې ده.
د عوامي نیشنل ګوند صوبايي صدر ایمل ولي خان د ښاغلي همدرد په مړينه په خپل بیان کې ويلي هغه تل د اظهار د اذادې لپاره مبارزه کوله.
وتلي پښتون سیاست وال او دانشور افراسیاب خټک د ښاغلي همدرد په مرګ په خپل ټویټر خواشيني ښودلې:
“د پیر سفید شاه همدرد وفات د صحافت لپاره ستر زیان دی”
د پيپلز ګوند مهم مشر او پخواني سېنېټر فرحت الله بابر لیکي د ژبې لپاره د ښاغلي همدرد خدمتونه د هېرلو نه دي.
پیر سفید د اوویام په لسيزه کې د پښتو ژبې اخبار وحدت شورو کړی ؤ، د وحدت تر مخه اخبار په پاکستان کې د افغان کډوالو او ځايي اولس تر منځه د مينې او د ورورولۍ په جوړولو کې مهم رول لوبولی ؤ.
افغان خبریال جاوېد همیم کاکړ لیکلي پیر صېب د ګڼو پښتنو خبریالانو استاد ؤ.
پښتنو شاعرانو او لیکوالو هم د ښاغلي همدرد په مړينه غمرازۍ کړي دي. د لیکوالونو تر مخه ورځپاڼې وحدت د ژبې او ادب خدمتونه د هیرولو نه دي.
پیر سفید شاه ته د پاکستان حکومت تمغه حسن کار کردګي او تمغه امتیاز هم ورکړي وو.
د افغانستان حکومت هم هغه ته افغان صدارتي جایزه ورکړې وه
