په پېښور کې په احتجاج بوختو بلدیاتي استازو د پولیس لخوا د اوښلن ګیس کارولو وروسته د صوبایي حکومت اؤ بلدیاتي استازو تر منځ مذاکرات کامیاب شوي اؤ وزیراعلا علي امین ګنډا پور د ټولو یونین کونسلو اؤ بېبر هوډ ناظمانو ته د پینځوؤ، پینځوؤ لکو روپو جاري کولو وینا کړې ده.
د شورو یا چهارشنبې په ورځ د ټولې صوبې بلدیاتي استازي د اختیاراتو اؤ پنګو نه ورکولو په ضد پېښور کې د احتجاج لپاره سړکونو ته راوتلي وؤ اؤ غوښتل یې چې د صوبایي اسمبلۍ مخې ته احتجاج وکړي خو پولیسو په احتجاج کوونکو ولسي استازو اوښلن ګیسونه غورځولي وؤ.
دغه بلدیاتي استازي د چهارشنبې په سهار د پېښور جناح پارک ته ورټول شوي وؤ اؤ د احتجاج کولو لپاره چې د صوبایي اسمبلۍ د څلور لاري نه په تېرېدو د سول سیکرټریټ ورتېرېدل نو پولیسو یې مخه ونیوله .
پولیسو هغوي د سول سیکرټریټ ته ورتېرېدو ته نه پرېښودل اؤ په هغوي یې سخت اوښلن ګیسونه کارولي وؤ چې له امله یې دغه بلدیاتي استازي د الغاؤ تلغاؤ په مهال سخت اغېزمن شوي وؤ.
د پېښور مئیر ښاغلی زبېر علي هم په دغه احتجاج کوونکو کې شامل وؤ اؤ هغه رسنیو سره خبرو کې ویلي وؤ، حکومت ظلم وکړو اؤ په داسې ظالمانه اقداماتو به د بلدیاتي استازو دا احتجاج نور هم وغځيږي.
زبېر علي ګواښ کړی ؤ چې بلدیاتي استازو سره د شوي ظلم بدله به اخستی شي.
په دې احتجاج کې د صوبایي واکمن ګوند پاکستان تحریک انصاف بلدیاتي نماینده ګان هم شامل وؤ اؤ هغوي هم پخپل حکومت سختې نیوکې کولې.
د مظاهره چیانو وینا وه چې صوبایي حکومت بلدیاتي استازو ته نه خو اختیارات ورکړي دي اؤ نه پنګې ورکوي چې له دې امله په سیمه ییزه کچه پرمختیایي کارونه په ټپه ولاړ دي.
د مظاهره چیانو وینا وه چې تحریک انصاف ګوند ژمنه کړې وه چې اختیارات به لاندې کچې ته منتقل کوي خو بیا یې پخپل حکومت کې نه خو اختیارات لاندې کچې ته منتقل کړل اؤ نه یې د بلدیاتي ادارو څه ډاډګيرنه وکړه.
وروسته بیا د پېښو د مئیر زبېرعلي په مشرۍ کې مظاهره چیانو د وزیراعلا په ماڼۍ کې د وزیراعلا علي امین ګنډا پور سره مذاکرات وکړل اؤ اؤ وزیر اعلا په دغو مذاکراتو کې ناظمانو ته د هغوي د ستونزو د هواري باور ورکړو.
د مذاکراتو په مهال وزیراعلا د یونین کونسلو اؤ نیبر هوډ ناظمانو ته د پینځوؤ، پینځوؤ لکو روپو د جاري کولو وینا وکړه اؤ بلدیاتي استازو سره یې ژمنه وکړه چې د بلدیاتي استازو د اختیاراتو په حواله د حکومت لخوا جاري کړل شوی هغه امر به بېرته واخلي چې د بلدیاتي استازو واکونه یې محدود کړي دي.
د وزیراعلا لخوا د دغه باور ورکولو نه وروسته مظاهره چیانو خپل احتجاج ختم کړو اؤ خېبر روډ یې د ټریفک په مخ پرانستو
Forum