د روس یو عدالت د گل، دوشنبې، په ورځ حکومت مخالف رهنما الیکسي نوالني ته پولیس سره د مزاحمت کولو او په غیرقانوني توگه د مظاهرې کولو په الزام د ١٥ ورځو قید او ٣٥٠ ډالرو جرمانې سزا ورکړي ده.
نوالي د اتوار، یکشنبې، په ورځ په ماسکو پولیس په داسې مهال گرقتار کړی و چې خپله په ماسکو او د روس په گڼ شمیر نورو ښارونو کې د وزیراعظم دمتري مدودیو خلاف په زرگونو خلکو مظاهرې کولې.
د حکومت وینا وه چې مظاهرو دپاره رسمي اجازت نامې نه دي اخیستل شوي او په غیرقانوني توگه کولی شي. د اتوار، یکشنبې، په ورځ د د نوالني ترڅنگ په لسگونو نور احتجاج کونکي هم نیول شوي وو.
نوالني په هغه لگول شوی الزام رد کړی دی او د روس سرکاري خبري ادارې ټاس ترمخه، هغه عدالت ته وویل چې احتجاج دپاره ټوله قانوني کاروايي سرته رسول شوي وه.
د کریملین، یا د حکومت ترجمان دمتري پیسکو ویلي په ماسکو کې حکومت د احتجاج منتظمینو ته دوه متبادل ځایونه ورکړي وو خو دغه ځایونه رد کړی شول. "په حقیقت کې په زور هغه ځایونو ته بوتلی شول چرته چې د (مظاهرې کولو) اجازت نه و،" پیسکو د گل، دوشنبې، په ورځ وویل.
امریکې د نوالني د گرفتارۍ سخته غندنه کړې ده. "د پرامنه احتجاج کونکو، د انساني حقونو څارنه کونکي او د صحافیانو نیول د بنیادي جمهوري اقدارو خلاف ورزي ده،" د امریکې د خارجه وزارت یا سټیټ ډپارټمنټ ترجمان مارک ټونر ویلي.
د روسي وزیراعظم دمتری مدودیو خلاف احتجاجونه د ښاغلي نوالني هغه تحقیقاتي رپورټ راپارولي وو چې پکې د ښاغلي مدودیو د کرپشن یا د بډو رشوتونو ذکر شوی و.
نوالني د عدالت نه وغوښتل چې وزیراعظم دمتري مدودیو دې تحقیقاتو دپاره راوبلل شي. ښاغلي مدودیو تر دا وخت په هغه لگول شوي الزاماتو ته څه ځواب نه دی ویلی.
