د امریکې د کانګرس د بهرنیو چارو کمېټې د بهرنیو چارو وزیر اینټني بلینکن ور بللی دی چې له افغانستانه د امریکايي ځواکونو د وتلو په اړه شاهدي او پوښتنو ته جوابونه ورکړي.
د دغې کمېټې مشر مایکل مککال د اګست پر درېیمه ناوخته بلینکن ته یو خط لېږلی چې پکې یې ویلي باید هغه د ستمبر پر 19مه ددغې کمېټې د غړو په وړاندې حاضر شي، که نه نو د استازو اېوان ته د سپکاوي تور به پرې ولګول شي.
مککال په خط کې بلینکن ته لیکلي، "تاسې [له افغانستانه] د وتلو او انخلا لپاره د ډیپارټمنټ [بهرنیو چارو وزارت] د وروستي فیصله کوونکي په توګه کار کاوه".
د کانګرس د بهرنیو چارو د کمېټۍ مشر په خط کې زیاته کړې، درې کاله وروسته بلینکن "د دې وړ دی چې د کمیټې د ممکنه قانون سازۍ لپاره د پام وړ معلومات ورکړي چې مقصد یې [له افغانستانه] د وتلو د ناورین د غلطیو په مخنیوي کې مرسته او د [سټېټ] ډیپارټمنټ د قانون سازۍ د واک ممکنه اصلاحات کول دي".
د امریکا د بهرنیو چارو وزارت ویاند مېتیو میلر وویل، د بهرنیو اړیکو د کمېټې لخوا په ټاکل شوې نیټه بلینکن د رسایي وړ نه دی، خو د مک کال غوښتنې ته د غور لپاره یې د "مناسب متبادل" وړاندیز کړی دی.
میلر په یوه بیان کې ویلي، "دا د مایوسۍ خبره ده چې د بهرنیو چارو وزارت سره په ښه نیت د چارو د دوام پر ځای کمېټې [د استازو اېوان د بهرنیو اړیکو کمیټې] یوه بله غیر ضروري د حاضرېدو غوښتنه کړې ده".
د امریکا د بهرنیو چارو وزارت ویاند ویلي چې بلینکن تر اوسه د افغانستان په اړه 14 ځله کانګرس ته شاهدي ورکړې او یواځې څلور ځله د اېوان د بهرنیو اړیکو کمیټې ته چې مشري یې مک کال کوي حاضر شوی دی.
هغه دا هم وویل د بهرنیو چارو وزارت دې کمېټې ته له افغانستانه د امریکا د وتلو په اړه څه دپاسه شل زره پاڼې اسناد او معلومات وړاندې کړي دي.
د میلر په وینا، په تېرو میاشتو کې کانګرس له افغانستانه د امریکا د وتلو په بهیر کې شامل یو شمېر امریکایي چارواکي د شاهدۍ لپاره بللي دي.
مککال د ستمبر پر درېیمه بلینکن ته په استولي لیک کې لیکلي، اوسني او پخوانیو امریکايي چارواکو تایید کړې چې اینټني بلینکن له افغانستانه د پوځ د وتلو د بهیر په تړاو په مسلو کې "وروستی پریکړه کوونکی" وو.
بلینکن ته د مککال په لیک کې لیکل شوي، "په دې خاطر تاسې په داسې حیثیت کې یاست چې د وتلو د ناورین لرونکو غلطیو د مخنیوي سره د مرستې لپاره د ممکنه قوانینو په اړه لکه د بهرنیو چارو وزارات د قانوني صلاحیت د اصلاح لپاره د کمیټې تحفظاتو ته ځواب ووایاست".
مککال له څو کلونو راهیسې له افغانستانه د امریکا د وتلو په اړه څېړنه کوي او بلینکن یې په داسې حال کې د پوښتنو جوابونو ته ور بللی چې د نومبر د پینځمې تر صدارتي ټاکنو مخکې له افغانستانه د امریکايي ځواکونو د وتلو په اړه پېښې ډېرې متضاد شوې دي.
یادونه:- د رپوټ ځینې معلومات له اې پي خبري ایجنسۍ اخیستل شوي دي.
Forum