امریکایي سینیټ د دفاع د وزیر په توګه د پيټ هیګزیت د نوم منظوري ورکړه

د امریکې سینیټ د هیواد د دفاع د وزیر په توګه د پيټ هیګزیت د نوم منظوري ورکړې ده.

د جمعې په شپه د امریکا په 100 کسیز سینیټ کې د پيټ هیګزیت د توثیق لپاره رایې ورکړل شوي چې پکې د سینیټ نیمایي 50 غړو د هغه په ملاتړ اؤ 50 نورو یې بیا په مخالفت کې خپلې رایې ورکړې.

د دفاع د نومول شوي وزیر د توثیق لپاره کارول شوې رایې چې کله یو برابر شوې نو بیا نایب صدر جی ډي وینس خپله فېصله ییزه رایې وکاروله.

د امریکایي حکوومت په نظام کې نایب صدر د سینیټ صدر وي اؤ کله چې د سینیټ غړي په یوه معامله یو برابر رایې ورکړي نو په هغه صورت کې بیا نایب صدر خپله فیصله ییزه رایې کاروي.

د امریکې په تاریخ کې دا دویم دی چې نایب صدر د چا د نامزدګۍ په معامله خپله رایې وکاروله.

د جی ډي وینس له رایې وروستو سینیټ د 50 رایو په مقابله کې په 51 رایو د دفاع د وزیر په توګه د پيټ هیګزیت د نوم منظوري ورکړه.

هیګزبت تر دې وړاندې د امریکا نشریاتي اداره فاکس نیوز کې د ټي وي د نظاق یا کوربه په توګه کار کړی دی اؤ هغه د یو شمیر کتابونو مصنف هم دی.

نوموړي په عراق، افغانستان اؤ ګوانتانامو بی کې په ارمي نیشنل ګارډ کې د افسر په توګه هم ذمه وارۍ ترسره کړې دي.

سینیټ تر دې څلور ورځې وړاندې د خارجه وزیر په توګه د مارکو روبیو د نوم منظوري ورکړې وه. هغه د ټرمپ د کابینې وړومبی غړی ؤ چې سیینټ یې د خارجه وزیر په توګه نوم منظور کړی ؤ .

د مارکو روبیو په ملاتړ د سینیټ 99غړو خپلې رایې ورکړې .

تر هغه وروسته جان ریټکلف د ټرمپ د کابینې دویم غړی ؤ چې سیینیټ یې د سي آي اې د مشر په توګه د نوم منظوري ورکړې ده.

د زیارت په ورځ د سینیټ 74غړو د هغه په ملاتړ اؤ 25 یې په مخالفت کې رایې ورکړې وې.