د امریکې په سېنټ کې د پخواني صدر ډاڼلډ ټرمپ د مواخذې یا هغه د نااهله ثابتولو په مقدمه کې تېره میاشت د کانګرس په ودانۍ د حملې نوي وډیوز ښودل شوي دي او د زیارت، پنجشنبې، په ورځ به د ډېموکرېټک پارټۍ د کانګرس غړي د خپل دې دریځ په حق کې نور دلایل ورکوي چې په کانګرس حمله په مبینه توګه ډانلډ ټرمپ راپارولې وه چې هغه مهال لا صدر و.
د ډېموکرېټک پارټۍ د کانګرس غړو د شورو، چهارشنبې، په ورځ د مواخذې د مقدمې د سېنټ منصفینو ته د جنورۍ په شپږمه نېټه په کانګرس د یرغل داسې نوي وډیوز وښودل چې ډیر په کره ډول د تشدد کچه څرګندوي.
د وي او ای رپورټ وايي دغه وډیوز وړاندې نه دي لیدل شوي او پکې لیدل کېږي چې د سلګونو په تعداد کې د پخواني صدر ډانلډ ټرمپ پلویان په داسې حال کې په کانګرس یرغل کوي چې په ودانۍ کې د صدراتي انتخاب نتیجه په رسمي توګه د منظورول دپاره خصوصي غونډه شروع وي. یرغلګر د کانګرس په ودانۍ کې د سېنټ او د هاوس اف رېپرېزېنټېټیوز تالارونو ته ورننوځي او ځینې کسان په هغو دستاوېزاتو کې هم لاس وهي چې د کانګرس غړو د یرغل په مهال د خپل تحفظ دپاره د وتلو نه وړاندې وروسته پرېښودي دي.
د وي او ای رپورټ وايي ځینو وران کارو نعرې کولې چې دوی د نایب صدر مایک پېنس په لټون کې دي او هغه ځوړندول ځکه چې د صدر ټرمپ د غوښتنو باوجود هغه د صدارتي انتخاب نتیجه په رسمي ډول تسلیموي. صدر ټرمپ د نومبر په دریمه نېټه شوي انتخاب کې په پراخه کچه د درغلۍ الزامات پورې کړي دي خو چارواکي وايي په دې اړه کوم شواهد نه دي موندل شوي. ډانلډ ټرمپ غوښتل چې د صدارتي انتخاب نتیجه دې وه نه منل شي دا ډول جوبایډن صدارت ته وه نه رسيږي. خو د مایک پېنس په مشرۍ کې د کانګرس خصوصي غونډه کې د صدارتي انتخاب نتیجه تاید شوه او جوبایډن صدر وټاکل شو.
د وي او ای د رپورټ ترمخه د سېنټ د مواخذې په مقدمه کې ښودل شویو وډیوز کې دا هم لیدل کېږي چې په کانګرس ځینې یرغلګرو د هاوس اف رېپرېزېنټېټیوز سپېکرې نېنسي پلوسي د لټولو غږونه کول. ځینې احتجاج کوونکي د هغې دفتر ته ورغلي وو خو هغه مامورینو وېستلي وه او د هغې د عملې غړو هم د تړل شویو دروازو په شا پناه اخیستې وه.
د اېمپیچمنټ یا د مواخذې یوې منېجرې سټېسي پلېسکېټ اورېدنې ته وویل چې احتجاج کوونکي د مایک پېنس په لټون کې وو ځکه چې هغه وطن سره مېنه کونکی دی او هغه یې محاکمه کول غوښتل.
د مېري لېنډ ریاست نه د ډېموکرېټک پارټۍ کانګرسمېن جېمي رېسکن په خپله وېنا کې وویل صدر ټرمپ په کانګرس حمله راپارولې وه. هاوس اف رېپرېزېنټېټیوز یا اېوان نمایندګان هم په دغه یو الزام د ډانلډ خلاف د مواخذې قرارداد منظور کړی دی.
د قواعدو دلاندې د مواخذې دغه قرارداد اوس سېنټ د وړاندې کړی شوی دی او مقدمه پې شروع ده.
سېنټ د ۴۴ په مقابل کې په ۵۶ ووټونو د مقدمې منظوري ورکړه او د ډانلډ ټرمپ دا دریځ یې رد کړو چې چونکې هغه اوس صدر نه دی پاتې شوی نو مواخذه یې نشي کېدلی.
د ۱۰۰ غړو سېڼت به ډانلډ ټرمپ د مواخذې دپاره په دریو کې په دوو برخو رایو د مواخذې قرارداد منظوروي. په سېنټ کې د واکمن ډېموکرېټک او د پخواني صدر ډانلډ ټرمپ د حزب اختلاف ريپبلېکن پارټۍ برابر چوکۍ لري چې مطلب یې دی چې د ریپبلېکن پارټۍ د سېنټ ۱۴ غړي به هم د خپل ګوند د پخواني صدر په ضد رای ورکوي.
ډانلډ ټرمپ د امریکې په تاریخ کې لومړی صدر دی چې په کانګرس کې یې دوه ځله مواخذه شوې ده.
ډانلډ ټرمپ د ډېموکرېټک دا غوښتنې رد کړي چې هغه دې د مواخذې په مقدمه کې خپل دریځ خپله وړاندې کړي.
د اېوان نماېندګانو د اېمپېچمنټ یا د مواخذې مشران چې د سېنټ په مقدمه کې خپل دلایل د زیارت، پنجشنبې، په ورځ ختم کړي نو د پخواني صدر ټرمپ وکیلان به بیا خپل موقف وړاندې کوي. دوی ته ۱۶ ګڼې وخت ورکړی شوی دی او د جمعې او خالي، شنبې، په ورځو کې به خپل دلایل سر ته رسوي.
د ډانلډ ټرمپ وکیلان وايي پخوانی صدر په کانګرس د شوي حملې په لړ کې هیڅ مسولیت په غاړه نه لري او دا چې د هغه د کومې وېنا په بنیاد چې په هغه په مبینه توګه د تشدد د راپارولو الزام لګول کېږي هغه د ایین د لومړۍ مادې دلاندې کړې چې د رای د ازادۍ ضمانت ورکوي.
