د افغانستان صدر حامد کرزي وئيلي د خپلې واکمنۍ په موده کې يې هڅه وکړه چې افغان له هرې خوا په پښو ودروي اؤ نور بايد د پردو په وړاندې محتاجه پاتې نه شي اؤ تر دې وروستو به هم د يو عادي افغان په توگه د حکومت اؤ نظام په مضبوطو کې دنوي افغان حکومت سره بشپړ ملاتړ وکړي.
هغه دا څرگندونې د جمعې په ورځ د کابل په صدارتي ماڼۍ ارگ کې د وائس اف امريکه ډيوه خبريال فاروق فراق سره دخبرو په مهال کړي دي.
ټال شوې ده په افغانستان کې د نوي صدر په توگه د اشرف غني د منتخب کيدو وروستو حامد کرزى د گل په ورځ اقتدار نوي صدر ته سپاري اؤ دا لمړى ځل دى چې د افغانستان دننه په جهموري نظام کې په سياسي توگه يو صدر په پرامنه توگه حکومتي واک د اولس لخوا ټاکل شوي صدر ته سپاري.
حامد کرزي سره د ارگ په صدارتي ماڼۍ کې په وروستي ځل د جمعې د نمونځ اداکولو اؤ الوداعي ليدنو دپاره د افغانستان د بيلابيلو ولايتونو واليان، قومي اؤ سياسي مشران ملاقات ته ورټول شوي وؤ.
د خپلو خبرو په مهال حامد کرزي وويل هغه اوس هم په دې عقيده دى چې افغانستان کۀ هرڅو د پرمختيا زړۀ پورې مزل کړى خو لا ډير څه کول ورته پاتې دي.
د حامد کرزي په وينا اوس نو هغه مطمئين دى چې څنگه په سوله ائيز ډول افغاناستان کې د جمهوري رياست ټاکنې سرته ورسيدې ، همدغه راز به دافغانستان نوى حکومت اؤ اولس خپل هيواد کې د سولې، د ډيموکراسۍ د پياوړتيا، اقتصادي اؤ ټولنيزو پرمختگونو دپاره په گډ ډول گامونه واخلي.
حامد کرزى چې د غرمې د ډوډۍ په ميز يې د ډيوه راډيو سره دغه خبرې کولې بيخي مطمئين ښکاريدو اؤ د اقتدار په پريښودو يې په مخ هيڅ د ناخوښۍ نخښې نه ليدل کيدې ، ډلې ډلې کسان دهغه خوا له په ادب اؤ احترام ورغلل اؤ ټولو په يوه خوله د حامد کرزي ديارلس کلنه دوره د افغانستان د پرمختيا دپاره يوه زرينه دوره وگرځوله ، هغه هرچا ته ډاډ ورکړو چې د هيواد خدمت د ټولو گډه وظيفه ده اؤ جمهور رئس وي که نۀ وي دغه وظيفه به د يو عادي افغان په توگه ترسره کوي .
د حامد کرزي سره په دغه ليدنه کې د پيښور گڼ شميرخبريالان چې پکې د پيښور پريس کلب صدر ناصر حسين، عمومي سکتر فداعديل، د خيبريونين اف جرنلسټس مرستيال مشر محمد نعيم ، ناصرداوړ، نثار محمدخان اؤ افغان خبريال عبدالحق عمري شامل وؤ.
حامد کرزي په دغه ليدنه کې د پيښور د خبريالانو څخه د پيښور د اوسني وضعيت په هکله حال احوال هم واخستو اؤ د پيښور په ذکر کې خاصه خوښي وښودله .
دپيښور خبريالانو په دغه موقعه افغان صدر څخه افغانستان کې د قيد پاکستاني خبريال فيض الله د خوشې کيدو غوښتنه هم دانساني همدردۍ په بنياد وکړه چې د هغې په جواب کې حامد کرزي ډاډ ورکړو ډير زر به ددغه پاکستاني صحافي د خوشې کولو دپاره اقدام وکړي