واشنګټن ـــــ د هند وزیراعظم نریندرا مودي د خپل هېواد په شمالي ښار ایودهیا کې د تاریخي بابري جومات پر مځکه پرون د هندوانو د یوه لانجمن رام مندر بنیاد کښېښوو، هلته یې عبادت وکړ او بیا یې وینا وکړه چې پر ټیلیویژن میلینونو خلکو کتله.
پاکستان د هند دا ګام په کلکه غندلی چې وایي د شپاړسمې عیسوي پېړۍ د تاریخي بابري جومات پر مځکه مندر جوړوي.
د مندر د بنیاد ایښودلو تر مراسمو وروسته غونډې ته په وینا کې نریندرا مودي وویل، پر دې خاص موقع په ټوله نړۍ کې د رام منونکي د مبارکۍ حقدار دي:
"په ایودهیا ښار کې د پېړیو انتظار ختم شوی او روښانه باب پیلېدونکی دی، دا د هند لپاره یوه جذباتي شېبه ده".
مودي پخپله وینا کې د رام مندر جوړېدل د خپلو روایاتو نوی علامت وباله او ویې ویل چې د دې مندر په جوړېدو سره به د دوی د عقیدې او قومي جذباتو انځورګري هم وشي.
د رام مندر جوړېدل د نریندرا مودي د بهارتیه جنتا ګوند لپاره یوه کامیابي ګڼل کېږي، چې د تېرو درو لسیزو یې د دې لپاره مبارزه کوله او غوښتل یې چې د هندوانو د معبود راما لپاره مندر جوړ کړي.
د پاکستان د بهرنیو چارو وزارت په یوه بیان کې د هند د سپریم کورټ پر فیصله نیوکې کړې چې وایي له کبله یې د دې مندر جوړېدو لپاره لاره برابره شوه. خارجه وزارت پخپل بیان کې ویلي دا نه یواځې په هند کې تر انصاف د عقیدې د برترۍ ښکارندویي کوي بلکې د اکثریت پالنې نشاندهي هم کوي چې وایي دې کار اقلیتونه خصوصاً مسلمانان او د هغوی د عبادت ځایونه له خطر سره مخ کړي.
دا مندر خاص پر هغه ځای جوړ شوی چې د هندوانو په عقیده دا د راما د زېږېدو ځای دی، پر دې ځای جوړ شوی د شپاړسمې پېړۍ بابري مسجد په 1992م کال کې هندوانو ونړاوه چې د هندوانو او مسلمانانو تر منځ یې جګړې را وپارولې.
هندوانو غوښتل چې پر دې مځکه د رام مندر جوړ شي او د هند سپریم کورټ د تېر کال په نومبر میاشت کې د دې مندر د جوړېدو اجازه ورکړه.