په قطر کې د افغان طالبانو د سياسي دفتر مشر ملا عبدالغني برادر ويلي مشرتابه يې په پاکستان کې ده او د زخميانو ناروغانو علاج يې هم په ياد هېواد کې کيږي.
ملا برادر د طالبانو د پلاوي مل دی چې په درې ورځنۍ سرکاري دوره پاکستان ته تللی او په يو ویډیو کې ښوول کيږي چې په کراچۍ کې په يو ممکنه روغتون کې د ټپي شوو طالبانو جنګيالو پوښتنې ته ورغلی.
د ازادو سرچينو له خوا د ویډیو تصديق لا ترديد نه دی شوی خو په سوشل مېډيا ياده ویډيو ډېره خوره شوې او افغانان يې د ملا برادر له خوا د هغو تورونو يو غټ اعتراف ګڼي چې وخت په وخت افغان حکومت او د امريکا او نېټو پوځي چارواکو په پاکستان لګولی. پاکستان دې ویډيو ته غبرګون نه دی ښودلی.
خو وړاندې یې تل دغسې ویلي دي چې په طالبانو د پاکستان اثر محدود دی. که څه هم پاکستان وايي په طالبانو یې اثر محدود دی خو زیاتره وخت دعوا هم کوي چې طالبان یې خبرو ته کینول.
د پاکستان وزیراعظم عمران خان هم د کابل په خپل ورستي سفر کې ژمنه کړې وه چې په طالبانو به د ډز بندې غږ کوي.
ملا برادر چې په ياده وداني کې يو ګڼ شمېر طالب پلوو پښتنو ته وينا کوي وايي "ټوله مشرتابه مو دلته ده او يواځې دا علاج لا ممکنه نه ده چې په خپل ملک کې يې وکړو. مونږ مجبور يو چې دا وزغمو".
په پاکستان کې د ځان د بندي کېدو په اړه ملا برادر وايي "زه چې اته نهه کاله دلته وم او زما سره چې يې هر څه وکړه په ځان يې وړم. د ځان پېغور يې نه بولم ځکه دا زه د مريضانو، زخميانو او مشرانو د پاره وړم".
ملا برادر په 2010م کال کې په کراچۍ کې د پاکستاني استخباراتي ايجنسيانو له خوا نيول شوی وو او نزدې نهه کاله بند يې تېر کړی.
د مېډیا تر مخه ملا برادر د افغانستان د هغه وخت د ولسمشر حامد کرزي د حکومت سره د دوبۍ د لارې اړيکې نيولې وې او د سولې په اړه يې ممکنه خبرې کول غوښته چې ونيول شو.
پاکستان د ملا برادر د بندي کولو او بيا خوشي کولو په اړه کوم سپيناوی نه دی کړی.
د يادې ویډيو په اړه چې افغان ژورنالېسټ بلال سروري په خپل ټوېټر خوره کړې ليکي، د ملا برادر په اړه ورته "د کراچۍ پاکستان نه معلومات ورکړل شوي چې ملا برادر زخمي طالبانو ته مالي مرستې رسولي".
د طالبانو له خوا د دې دعوې په اړه کوم سپيناوی نه دی راغلی خو د ملا برادر د خبرو دا تاثر اخستل کيږي چې زخمي طالبانو ته په خپله وينا کې د صبر او زغم مشوره ورکوي او وايي هيڅ معاوضه دومره لوړه نه ده چې د ده په وينا د مجاهدينو د قربانۍ ور رسېږي.
ملا برادر په خپله وينا کې د طالبانو او امريکا تر منځ د شوې لوظنامې په اړه وايي طالبان د کفارو سره خبرو ته، د ده په وينا، د مجاهدينو د قربانۍ په سوب ناست دي. ښاغلی برادر وايي:
"د دنيا هغه مغرور او متکبر کفار زما سره کښېني. ټرمپ ماته وايي چې زه ستا سره خبرې کوم. د ټرمپ سره ما 35 دقيقې خبرې وکړې يعنې ټيليفون ما ځينې کټ کړ ده نه دی کټ کړی"، او له دې سره په ګڼ شمېر کې موجود طالبانو په زوره د "الله اکبر" چیغه ووهي چې په ياده ویډيو کې اورېدل کيږي.
طالبان له امریکا سره د قطر په لاسليک شوې لوظنامه کې د "امارت اسلامي افغانستان" په ځای د طالب ډلې په هيڅ پېژندل شوې.
پاکستان د امريکا او طالبانو تر منځ د شوې لوظنامې هرکلی کړی او دا يې خپله سفارتي ګټه بللې خو د افغانستان يو بل مهم ګاونډی ملک ايران د يادې لوظنامې په اړه بېخي بدل نظر لري.
د ايران د خارجه چارو وزير جواد ظريف د افغانستان شخصي ټيليوېژن طلوع ته په يوه مرکه کې ويلي "مونږ دا په دې بڼه نه غواړو چې امريکايان دې لاړ شي او د طالبانو سره دې خبرو ته کښېني. دا مونږ يو خطرناک عمل بولو".
جواد ظريف وايي هېواد يې د ملګرو ملتونو د قراداد سره سم طالبان يوه ترهګره ډله بولي او زياتوي طالبان يې ايران تر اوسه په خپل ترهګر نوملړ کې ساتي او د ترهګرو ډله يې مني.
طالبانو په اتم اګست 1998م کال کې مزار شريف ونيولو او د ايران په قونصليټ یې برید کړی وو، چې پکې 11 ايرانيان، اته سفارتکار، يو ژورنالېسټ او دوه د سفارت کارمندان وژل شوي وو او د سوبه يې ايران د طالبانو تر سقوط پورې په افغانستان کې خپل سفارت بند ساتلی وو.
د ايران له خوا طالبانو ته د پوځي او نورو مرستو ورکولو په اړه چې د جواد ظريف نه وپوښتل شول نو هغه وايي "مونږ طالبانو ته هيڅ پوځي مرستې نه ورکوو. مونږ د هغو د زخميانو علاج نه کوو. خو زمونږ ورسره سنجيده خبرې شته. طالبان به ايران ته ځي راځي خو په ايران کې يې کوم هیډکوارټر لا پوځي مرکز نه شته".