واشنګټن ــــ د امریکې ولسمشر جوبایډن پرون وویل چې هېواد یې د میانمار پر هغو پوځي مشرانو بندیزونه لګوي چې کودتا یې وکړه او ویې ویل چې پوځ ضرور باید واک بیرته پرېږدي او د دې هېواد جمهوریت ته درناوی ولري.
صدر بایډن د شورو- چارشنبې په ورځ وویل، حکومت یې د دې لپاره ګامونه اخلي چې د برما د حکومتي فنډ یو ارب ډالرو ته په ناسمه توګه د میانمار د پوځي جنرلانو د رسایي مخه ونیسي.
ښاغلي بایډن د دې تر څنګ یو فرمان هم تایید کړی چې له مخې به یې پر هغو پوځي مشرانو، د هغوی پر کاروباري ګټو او د کورنۍ پر نیژدې غړو سمدستي بندیزونه لګېږي چې په میانمار کې یې د جمهوري حکومت په ضد کودتا کړې ده.
صدر بایډن په میانمار کې د روانو حالاتو په اړه پخپلو څرګندونو کې ویلي، دغه پوځي مشران به- چې له بندیزونو سره به مخ کېږي- روانه اوونۍ په ګوته کړي. ښاغلي بایډن وویل:
"موږ به د هغو امریکایي آثاثو پر لېږلو او صادرلو هم سخت کنټرول وساتو چې د برما حکومت ته ترې ګټه رسېږي، خو له روغتیا، د مدني ټولنې له ډلو او په هغو برخو کې به خپل ملاتړ ته دوام ورکړو چې د برما عامو خلکو ته یې ګټه رسېږي".
د میانمار پوځ د فرورۍ پر لومړۍ نېټه د هېواد واک په لاس کې واخیست او د دې هېواد مشره آنګ سان سوچي، صدر یو وین مینت او نور سېول چارواکي یې ونیول.
پوځ وروسته له هغه د میانمار واک په لاس کې واخیست چې د پوځ او واکمن ګوند نېشنل لیګ فار ډیموکرېسي تر منځ د نومبر د انتخاباتو پر سر تاوتریخوالی زیات شو او پوځ د دې ګوند د انتخاباتو له ګټلو انکار وکړ.
د امریکې ولسمشر په داسې وخت کې د میانمار پر پوځي مشرانو د بندیزونو اعلان کړی، چې په دې هېواد کې په دویمه اوونۍ هم خلکو د پوځي کوتا په ضد احتجاجونو ته دوام ورکړی دی.
صدر بایډن د میانمار پر پوځي مشرانو ږغ وکړ، چې د دې هېواد مشره آنګ سان سوچي او نور د جمهوري حکومت مشران او د مدني ټولنې نیولي فعالان سمدستي خوشي کړي:
"څنګه چې احتجاجونه زیاتېږي، د هغو خلکو په ضد- چې د خپلو ټاکلیو جمهوري حقونو اظهار کوي- تشدد د منلو نه دی او موږ به یې په ضد ږغ پورته کوو. د برما خلک غواړي چې ږغونه یې واورېدل شي او نړۍ ورته ګوري، موږ به تیار یو چې د بندیزونو په برخه کې اضافي ګامونه واخلو او موږ به له خپلو نړیوالو متحدینو سره کار کوو چې هغوی په دې برخه کې ملګرتیا ته وهڅوو".
د امریکې د سېنټ د بهرنیو اړیکو د کمېټۍ مشر باب مینینډیز د صدر بایډن د بندیزونو هرکلی کړی او ویلي یې دي چې که د میانمار پوځي مشران آنګ سان سوچي او د دې هېواد نور منتخب مشران سمدستي خوشي نه کړي او هغوی ته بیرته خپلې جمهوري څوکۍ ونه سپاري نو باید ریښتینې نتیجې یې وویني.
د یادونې وړ ده چې په میانمار کې پوځي کودتا د دې هېواد پر اقتصاد هم ژور اغېز کړی دی. تېره اوونۍ د جاپان د مشروباتو او څښاک یوې لویې کمپنۍ کېرین اعلان وکړ، چې د میانمار د پوځ د مشروباتو له کمپنۍ میانمار بېر سره یې شراکت ختم کړی دی، همدارنګه د سه شنبې- نهې په ورځ د سنګاپور یوې بلې کمپنۍ هم د میانمار له ورجینیا ټوبیکو کمپنۍ سره خپل شراکت ختم کړ، چې ملکیت یې له پوځ سره دی.