د هند د بهرنيو چاروزارت ویلي، د طالبانو په خواست په دوحه کې د طالبانو د سياسي دفتر مشر شېر محمد عباس ستانکزۍ په قطر کې د هند د سفير دېپک ميتل سره ليدلي دي.
دغه ليدنه چې د نهې/سه شنبې په ورځ (31 اګست) په دوحه کې د هند په سفارتخانه کې شوې دهشوې طالبانو يې په اړه په رسمي ډول څه نه دي ویلي.
د هند د بهرنيو چارو وزارت ویلي، په ليدنه کې "سفير د هند دغه اندېښنه را پورته کړې چې د افغانستان خاوره د هند پرضد هلو ځلو او څه قسمه ترهګرۍ دپاره ونه کارول شي".
"او د طالبانو استازي دا باور ورکړی چې دغه مسله به په مثبته توګه هواره شي".
Press Release on the Meeting in Doha.Link : https://t.co/oyWaGXuHi9
— Arindam Bagchi (@MEAIndia) August 31, 2021
ويل شوي په ليدنه کې "په افغانستان کې د نښتو هندي وګړو په حفاظت سره ويستو او خونديتوب باندې بحث شوی دی. د افغان وګړو هند ته په تګ او په ځانګړي ډول د لږکيو، څوک چې هند ته تلل غواړي په اړه هم خبرې شوي دي".
دا ليدنه په داسې حال کې شوې چې طالبانو په 15 اګست کابل او د افغانستان زياتره برخې نيولي دي.
په 19 اګست طالبانو ویلي وو د ټولو هېوادونو سره ښې سفارتي او تجارتي اړيکې غواړي او د هيڅ يو ملک سره د تجارت نه کولو خبره یې نه ده کړې.
د هند سفارتخانې د افغانستان خاوره د هند پرضد نه کارېدو خبره په داسې حال کې کړې چې د هند ګاونډي پاکستان وخت په وخت په هند تورونه لګولي چې په پاکستان کې د ترهګرۍ په شا لاس لري او هند يې بيا رد کړی دی.
دغه رنګ هند هم په پاکستان تورونه لګولي چې د هند پرضد ترهګر ساتي، خو پاکستان يې هم دغه ډول تورونه رد کړي دي.
او پاکستان په افغانستان کې د هند په موجودګۍ خپل اندېښنې هم څرګندې کړي دي.
د تير کال اکتوبر په میاشت کې د پاکستان وزیراعظم عمران خان په اسلام اباد کې يوې غونډې ته په وېنا کې په ښکاره ویلي وو،
په پاکستان کې دا اندېښنه موجوده ده چې هند به افغانستان د پاکستان پرضد وکاروي او په پاکستان کې به اړی ګړی جوړ کړي او بې ثباته يې کړي.
عمران خان دغه خبره په اسلام اباد کې د پاکستان او افغانستان د سوداګرۍ او پانګونې دوه ورځنې غونډې ته په وېنا کې کړې وه.
طالبانو پرون د نهې/سه شنبې په ورځ ویلي، په کندهار کې د طالبانو مشر ملا هبت الله په مشرۍ د شنبې د خالي د ورځې نه تر دوشنبې/ ګل د ورځې پورې درې ورځنۍ غونډه شوې او د نورو موضوعاتو سره پکې د نوي اسلامي حکومت په جوړولو او د کابيني په اړه لازمي مشورې شوي دي.