تېره ورځ په پینځمه اؤ وروستۍ معلومه مقدمه کې دعلي وزیر دضمانت کیدو نه وروسته دسیند صوبې حکومت دجیل یا زندان انتظامیې ته امر کړی چې علي وزیر اوس د ډي ایي خان په یوه بله مقدمه کې ونیسي.
دپښتون ژغورنې غورځنګ مشر منظور پښتین وایي دوئ ته معلومه ده چې دا ظالمانه حربې پوځ پوځ اؤ استخباراتي شبکې استعمالوي خو وایي دجمهوریت دعویدار سیاسي ګوندونه چې په کوم انداز دهغوئ(پوځ اؤ ادارو) مرسته کوي دا دمایوسۍ وړ خبره ده.
منظور پښتین دسیند صوبې دجیل خانه جاتو د مشر یا ایي جي ددفتر له لوري دکراچۍ زندان ته دلیږل شوي هغه امر عکس هم پخپله ټویټر خپور کړی چې پکې دسیند دکورنیو چارو د وزارت له لوري د ډيره اسماعیل خان په یوه مقدمه کې دعلي وزیر دنیولو امرشوی دی.
سندھ حکومت ہوم ڈیپارٹمنٹ کی طرف سے کراچی جیل انتظامیہ کو علی وزیر کو ڈی ائی خان کے ایک FIR میں گرفتاری کا حکم جاری۔ہمیں پتہ ہے کہ یہ ظالمانہ حربے فوج اور خفیہ ادارے استعمال کر رہے ہیں مگر جمہوریت کے دعویدارسیاسی پارٹیاں جس انداز سے ساتھ دے رہے ہیں وہ انتہائی مایوس کُن ہے۔ pic.twitter.com/uLeWz1SUp9
— Manzoor Pashteen (@ManzoorPashteen) November 15, 2022
دسیند صوبې حکومت لا په سمدستي توګه په دې اړه څه نه دي ویلي خو په دې وروستیو کې سیند صوبه کې د واکمن پاکستان پیپلز ګوند مشر بلاول بوټو زرداري دیو سیمینار په مهال دعلي وزیر د خوشې کولو په غوښتنه خپل غبرګون کې ویلي وؤ "لاړ شئ دهغه چا نه دعلي وزیر د خوشې کولو غوښتنه وکړئ چې چا نیولی دی"
دبلاول بوټو په دې غبرګون په ټولنیزو رسنیو دسختو نیوکو مخې ته له راتلو وروسته بلاول بوټو خپلې خبرې بیرته اخستې وې اؤ ویلي یې وؤ دهیواد د خارجه وزیر په توګه هغه ته داخبره کول نه وه پکار.
د ګل یا دوشنبې په ورځ د جنوبي وزيرستان نه د قومي اسمبلۍ دغړي او پښتون ژغورنې غورځنګ [پي ټي اېم] د مخکښ علي وزير وکيلانو ویلي وؤ چې، د علي وزیر په پينځمه او معلومه وروستۍ مقدمه کې هم ضمانت منظور شوی او اوس د پاتې قانوني کارروايۍ پوره کېدو وروسته به هغه خوشی شي.
دعلي وزیر وکیل شعېب سدوزئ وي او اې ډيوه ته پرون ویلي وؤ دپېښ،ر هايکورټ بنو ځانګې د 10 لکو روپو په مچلکو دعلي وزیر ضمانت منظور کړو، اوس به يې د خوشي کولو پاتې قانوني کارروايي کولی شي.
پرون چې د علي وزير په کومه مقدمه کې ضمانت منظور شوی، دا مقدمه د هغه پرضد د کال 2020 د نومبر په 15 نېټه د شمالي وزيرستان د میرانشا په تاڼه کې درج شوې چې پکې 121، 123، 124 A، 504، 505،506 او لوډ سپيکر اېکټ مادې لګول شوي دي.
د وکيلانو په وېنا دا مادې د بغاوت، رياست او رياستي ادارو د سپکاوي او په ضد يې د خلکو راپارولو په تور کې لګول کيږي.
علی وزیر کی ضمانت پہ ضمانت ہو رہی ہے۔ ہر بار کہا جاتا ہے یہ آخری کیس میں ضمانت تھی مگر رہائی ایک بار نہ ہوئی ۔ کاش عدالت رہائی کا فیصلہ دے ضمانتیں بہت ہو چکی۔ pic.twitter.com/52waxvqwxS
— Mian Iftikhar Husain (@MianIftikharHus) November 14, 2022
دعوامي نیشنل ګوند مرکزي عمومي سکتر میا افتخار حسین وایي دعلي وزیر په ضمانت پسې بل ضمانت کیږي اؤ هر ځل دا ویل کیږي چې دا وروستي کیس کې ضمانت ؤ خو راخلاص یو ځل هم نه شو.
هغه په ټویټر لیکلي دریغه چې دعدالت دعلي وزیر دخوشې کولو پرېکړه صادره کړي ځکه چې ضمانتونه یې ډیر وشول
علي وزير چې د کال 2020 راهسې د کراچۍ په مرکزي زندان کې بندي دی، په 25 اکتوبر عدالت په هغه مقدمه کې بري کړی په کومه کې چې هغه نيول شوی وو.
دا وخت په کراچۍ کې د علي وزير پرضد درې نورې مقدمې د کراچۍ د ترهګرۍ ضد عدالتونو کې روانې دي، په کوم کې چې د نوموړي ضمانتونه منظور شوي دي.
علي وزیر په کال 2020 کې په پېښور کې پوليسو نيولی او کراچۍ ته يې بوتللی وو، وروسته په کراچۍ کې په هغه پسې درې نورې مقدمې راویستل شوې او د څلورمې مقدمې اورېدنې په مهال پسې د ميرانشاه مقدمه راويستل شوې او ګرفتاري پکې ښکاره کړی شوې وه.