د پاکستان په سياسي او د احتساب ادارې په چارو نظر لرونکي وايي وخت راغلی چې د بډو رشوتونو د څار او مخنيوي اداره نېب ختمه کړی شي، ځکه چې د دوی په فکر دا اداره په پاکستان کې د اقتصادي او سیاسي ناارامۍ سبب ګرځي.
د پاکستان سپريم کورټ د احتساب په قوانينو کې د پي ډي ايم د تېر مرکزي حکومت بدلونونه د ستمبر په 15مه په داسې وخت منسوخ کړي چې انتخابي کمېشن په دې هيواد کې د انتخاباتو لپاره د راتلونکې جنورۍ مياشتې اخري هفته ټاکلې ده.
د سپريم کورټ تېر مشر قاضي عمر عطا بنديال د تېرې جمعې په ورځ د احتساب د قانون زياتره مادې رد کړې او هغه ټولې مقدمې یې بحال کړې کومې چې له بدلونونو وړاندې په نېب کې روانې وې.
د احتساب د ادارې په چارو نظر لرونکي نېب یوه بې ګټې اداره بولي. د دې ادارې یو پخوانی پراسیکیوټر عمران شفيق وي او اې ډیوه ته وویل، د ده په نظر د نېب اداره د پاکستان په خزانې بوج ده:
"نېب د کرپشن ختمولو پر ځای په پاکستان کې عدم استحکام پیدا کړی دی او ورسره يې اقتصاد هم د بې ثباتۍ سره مخ کړی دی او تر ټولو غټه خبره دا ده چې دا اداره په دې هيواد کې د سياسي وفاداریو په بدلولو کې هم ککړه پاتې شوې ده".
د احتساب په قوانينو کې د راوستل شوو بدلونونو لاقانونه ګرځول کېدو وروسته د پاکستان د شپږو پخوانیو وزيراعظمانو او صدر خلاف به د نېب قضيې بيا پرانستل شي، چې پکې آصف علي زرداري، نواز شريف، شهباز شريف، يوسف رضا ګیلاني ، شاهد خاقان عباسي، راجه پرويز اشرف او شوکت عزيز شامل دي.
په نېب کې د سياستدانانو خلاف د تېرو شلو کالو راهیسې د مقدمو څارونکي وايي ګومان دی چې دا قانون به لکه د تېر په څېر بيا د سياسي وفاداریو د بدلولو لپاره وکارول شي.
د پاکستان د اقتصادي او د نېب د چارو خبريال وقاص عظيم وایي، د نېب او پاکستاني سياستمدارانو ترمنځ تعلق لکه د پيشو او مږې جوړ شوی دی. عظیم وي او اې ډیوه ته وویل، دا اداره په سياستمدارانو پسې لګېدلې ده خو وایي د بډو رشوتونو په مخنيوي کې ناکامه شوې ده:
"اوس خو خلک دا هم وايي چې د نېب د مقدمو له کبله د پاکستان اقتصاد هم ځپل کيږي او که چېرې د نېب په ذريعه سياسي انجنېرنګ نه کيږي نو زه باوري يم چې معيشت به وده وکړي".
په دې اړه وي او اې ډیوه د نېب ادارې له ویاند سره د خبرو هڅه وکړه خو بریالۍ نه شوه.
د پاکستان سپريم کورټ په خپله فېصله کې د 50 کروړو څخه زياتې مقدمې د احتساب د دايره کار څخه خارج کوونکې ماده هم لاقانونه ګرزولې ده.
قانون پوهان وايي، د سپريم کورټ دې فېصلې ته هم په سپريم کورټ کې بيا کتنه کېدې شي. د هایکورټ وکیل ایډوکېټ اسد خان وایي، دې فېصلې ته به د بياکتنې دپاره په سپريم کورټ کې مضبوط بنيادونه پکار وي. اسد خان وي او اې ډیوه ته وویل:
"د دې سره سره به عدالت ته دا هم ويل وي چې په تېره کاروايي کې به دا قانوني نکات په پام کې ساتل وي، ځکه چې دا نکتې په تېره فېصله کي له پامه غورځول شوې دي نو ځکه دې ته دې بيا کتنه وشي، خو زما په فکر داسې مقدمو کې د بيا کتنې امکانات ډېر کم دي".
که يوې خوا ته د سپريم کورټ په دې فېصلې د تحريک انصاف غري خوشحاله ښکاري نو بلې خوا ته مسلم ليګ «ن» دا يوه لانجمنه فېصله بللې او بلاول بهټو زرداري ويلي دا پرېکړه د هغه لپاره د امکانه بهر نه وه.
د پي ډي ايم د پخواني حکومت راوستل شوي نېب تراميم پخواني وزيراعظم عمران خان په سپريم کورټ کې چېلنج کړي وو چې اوس پخپله د بډو رشوتونو په مقدمه کې په اټک جېل کې بنديوان پروت دی.