د افغانستان سره په پوله پرتې د خېبرپښتونخوا ناارامه ضلعه شمالي وزیرستان کې د ماین په يوه چاودنه کې درې کم عمره ماشومان وژل شوي دي.
د شمالي وزيرستان د پوليسو په وینا چاودنه د میرعلي په علاقه کې د کجوري چيک پوستې سره نزدې شوې ده.
د ميرعلي تاڼې چاوراکو وي او اې ډيوه ته وویل، چاودنه ماسپښين شوې، درې ماشومان چې وزې یې څرولې پکې په نخښه شوي دي.
د تاڼې يو پوليس چارواکي وويل، د تاڼې افسران موقعې ته ورغلي، د چاودنې نوعيت معلوموي.
کجوري چيک پوسته د شمالي وزيرستان مرکزي دروازه ده.
د پوليسو په وینا چاودنه کې د وژل شوو ماشومانو جسدونه د ميرعلي روغتون ته وړل شوي دي.
شمالي او جنوبي وزیرستان کې وخت په وخت دغه ډول چاودنې کيږي.
د تېر کال ستمبر په میاشت کې پرله پسې دوه ورځې دوه پېښې شوې وې، په شوال سيمه کې په يوه ماين چاودنه کې دوه کسان وژل شوي او د 25 پورې نور ژوبل شوي وو.
له دغې يوه ورځ وړاندې د شمالي وزيرستان په ګړيوم تحصيل کې په يو کور مارټر ګوله غورځېدلې وه، څلور ماشومان او مور يې پکې وژل شوي وو.
له دغې وړاندې د جون په مياشت کې د دته خېل تحصیل په چنار سیمه کې په يوه چاودنه کې یو کم عمره ماشوم وژل شوی وو.
د قبایلي ضلعو او په ځانګړي ډول د وزیرستان خلک ځمکني ماينونه او چاودنې یې لويه ستونزه بولي.
له دغې پېښې وړاندې د بر جنوبي وزیرستان په مکین سیمه کې دوه خویندې په ماین په چاودنه کې وژل شوې وې.
په جنوبي وزيرستان کې په تېرو کلونو کې د ماین چاودنو ښکار شوو کسانو په اسلام اباد کې احتجاج کړی او د حکومت څخه یې غوښتي د مځکني ماین چاودنو ښکار شوو کسانو لپاره دې د مرستو اعلان وکړي.
د پاکستان د پوځ ویاند مېجر جنرل احمد شریف چودري تېر کال د اپرېل په 25مه خبري غونډې ته ويلي وو، د قبايلي علاقو 65 فيصده برخه د بارودي سورنګانو څخه پاکه کړی شوې او 98000 نه زيات ماينونه او بمونه ترلاسه کړی شوي او ناکاره کړی شوي دی.