پاکستان کې په اتمه فرورۍ ترسره شوو انتخاباتو کې د ماتې خوړو وروسته، د جماعت اسلامي ګوند مشر سراج الحق او تېر کال د نوي جوړ شوي سياسي ګوند استحکام پاکستان مشر جهانګير ترين استعفاګانې ورکړي دي.
پاکستان کې د ترسره شوو انتخاباتو د غېر حتمي نتيجو ترمخه د قومي اسمبلۍ په ۲۶۴ څوکو ترسره انتخاباتو کې جماعت اسلامي يوه څوکۍ هم نه ده ګټلې او استحکام پاکستان ګوند دوه څوکۍ ترلاسه کړي دي.
د جماعت اسلامي مشر سراج الحق په اېکس ويلي، "د محنت او هڅو باوجود مې بريا ترلاسه نه کړی شوه، په انتخاباتو کې د ماتې خوړو زمه واري قبلوم او د جماعت اسلامي د مشرۍ څخه استعفا ورکوم".
محنت اور کوشش کے باوجود کامیابی نہین دلا سکا، الیکشن میں شکست کی ذمہ داری قبول کرتے ہوئے جماعت اسلامی کی امارت سے استعفی دے دیا ہے۔
— Siraj ul Haq (@SirajOfficial) February 12, 2024
سراج الحق په اتمه فرورۍ ترسره شوو انتخاباتو کې د خپلې پلارنۍ علاقې د خېبرپښتونخوا د کوز دير څخه د قومي اسمبلۍ په اېن اې (۶) ماتې خوړلې وه.
د الېکشن کمېشن د غېر حتمي نتيجو ترمخه، سراج الحق ۵۶،۵۳۸ ووټونه اخستي او په دغه حلقه ازاد امېدوار محمد بشير خان ۸۱،۰۶۰ ووټونه ترلاسه کړي او ګټلې یې وه.
هم پرون د استحکام پاکستان ګوند (آی پي پي) مشر جهانګير خان ترين په انتخاباتو کې د ماتې خوړولو وروسته نه يواځې د ګوند د مشرۍ څخه استعفا ورکړې بلکې د سياست پرېښودو یې هم ویلي دي.
نوموړي هم دغه اعلان په اېکس کړی دی.
I would like to thank everyone who supported me in this election and want to offer my congratulations to my opponents. I have immense respect for the will of the people of Pakistan. Therefore, I have decided to resign from my position as Chairman IPP and step away from politics…
— Jahangir Khan Tareen (@JahangirKTareen) February 12, 2024
جهانګير ترين په انتخاباتو کې د خپلې پلارنۍ علاقې پنجاب صوبې د لودهرا او ملتان سيمو نه د قومي اسمبلۍ په دوه حلقو (اېن اې ۱۵۵ لودهرا او اېن اې ۱۴۹ ملتان) امېدوار وو او دواړه څوکۍ يې بايللې وې.
جهانګير ترين چې د پاکستان شتمن سياستوال ياديږی، تېر کال یې د استحکام پاکستان په نوم خپل ګوند جوړ کړی وو، له دې وړاندې نوموړی د عمران خان په مشرۍ تحريک انصاف ګوند کې پاتې شوی او له هغې وړاندې د مسلم ليګ ق سره او د پخواني پوځي امر صدر مشرف په کابينه هم پاتې شوی وو.
د سراج الحق او جهانګير ترين نه وړاندې د عوامي نيشنل ګوند امير حېدر خان هوتي هم په انتخاباتو کې د ماتې خوړو وروسته د ګوند د سينير نايب صدر يا مرستیال مشر د څوکۍ څخه استعفا ورکړې وه.
میرے آبائی ضلع مردان کے تمام حلقوں پر اے این پی کی شکست کی ذمہ داری کھلے دل سے تسلیم کرتا ہوں۔ میرے حلقہ اور مردان کے عوام نے اگر ہم پر اعتماد نہیں کیا تو اور اسی شکست کی ذمہ داری قبول کرتے ہوئے پارٹی کے مرکزی سینئر نائب صدر کے عہدے سے مستعفی ہونے کا اعلان کرتا ہوں اور پارٹی کے…
— Ameer Haider Khan Hoti (@HaiderHotiANP) February 9, 2024
هوتي د خپلې پلارنۍ علاقې مردان په اېن اې ۲۲ د قومي اسمبلۍ په حلقه د عوامي نيشنل ګوند امېدوار وو، د الېکشن کمېشن د غېر حتمي نتيجو ترمخه نوموړي ۶۶،۶۷۴ ووټونه یې اخستي او په مقابله کې تحریک انصاف پلوه ازاد امېدوار محمد عاطف ۱۱۵،۸۰۱ ووټونه ترلاسه کړي او ګټلې یې ده.
پښتون ملت پاله عوامي نيشنل ګوند هم په تېرو انتخاباتو کې د قومي اسمبلۍ يوه څوکۍ هم نه ده ګټلې.