د خېبرپښتونوا سېلګرۍ سيمې سوات کې تېره شپه ناوخته د بڼ پوليسو په چوکۍ نامالومو وسله والو لاسي بم، ګرنېډ غورځولی، په نتيجه کې یې يو پوليس اهلکار وژل شوی او بل ژوبل شوی دی.
د سوات د بڼ پوليس چوکۍ يو چارواکي برکت علي وي او اې ډيوه ته وويل، د بڼ تاڼې د نوي کلي په چوکۍ تېره شپه يوولس نيمې بجې نامالومو کسانو لاسي بم غورځولی په نتيجه کې یې دوه پوليس اهلکار ژوبل شوي وو.
هغه وويل، ژوبل اهلکار د سېدو روغتون ته منتقل کړل شوي، هلته بيا يو [مدد محرد] ژوند د لاسه ورکړی او د بل درملنه روانه ده.
نوموړي زياته کړه، د بريد سره سم پوليس ځوابي ډزې کړي او د لټون عمليات پيل کړل شوي دي.
په ټولنيزو رسنیو د پېښې ويډيوز خپرې شوې، چې پکې د ډزو زورور اوازونه اورېدل کیږي.
په سمدستي توګه د پېښې زمه واري چا نه ده منلې.
له دې وړاندې د پاکستان د ازادۍ په ورځ 14م اګست د سوات د مټې تحصيل په سمبټ علاقه کې په پوليس چيک پوسته وال بريد کې يو پوليس اهلکار ژوبل شوی او وروسته یې په روغتون کې ژوند د لاسه ورکړی وو.
په 14م اګست د سوات په تيلګرام کې هم په پوليس چوکۍ وسله وال بريد شوی خو چارواکو په دغه بريد کې د کومې مرګ ژوبلې په اړه څه نه وو ویلي.
د یادو پېښو وروسته په 18م اګست د سوات ولسي پاڅون لخوا په هغه ځای غونډه راجوړه شوې چرته چې په پوليسو وسله وال بريد شوی وو.
سوات او د خېبرپښتونخوا صوبې په نورو سيمو کې د امن ولسي پاڅونونو لړۍ د کال 2022م راهسې پيل شوې کومه چې تراوسه روانه ده.
په سوات کې د کال 2022م د اګست په مياشت کې د وسله والو ښکاره کېدو خبرونه مخې ته راغلي، بيا د يو پوځي او پولیس افسر چې په ژوبل حالت کې وو، ويډيو په ټولنيزو رسنیو خپره شوې وه.
له دغې وروسته هم د دغه کال ستمبر په میاشت کې د سوات امن کمېټۍ د مشر ادريس خان په ګاډي چاودنه شوې چې پکې د امن کمېټۍ مشر سره د اته کسانو وژل شوی او د دغه پېښې دوه ورځې په يوه بله پېښه کې د امن کمېټۍ پخوانی پوخ عمره تن په وسله وال بريد کې وژل شوی وو.
د دغو دواړو پېښو زمه واري تحریک طالبان پاکستان منلې وه.
د خېبرپښتونخوا پوليسو او پوځ په خپله منلې وه چې په اګست 2022م کې د سوات او دير په لرې پرتو غرونو کې وسله وال ليدل شوي وو. او د دغې وروسته په سوات او صوبې په نورو برخو کې د ناامنۍ ضد او امن دپاره په غټه کچه لاريونونه او مظاهرې شوې وې.
دغه پېښې وروسته له هغې شوې چې د کال 2021م په 28 نومبر تحریک طالبان پاکستان د پاکستان د حکومت سره ډز بندي ختمه کړې او د څو بريدونو زمه وارۍ یې هم منلې وې.
خېبرپښتونخوا کې د بدامنۍ لړۍ چټکه شوې او د صوبې په بېلابيلو برخو کې نزدې هره ورځ د ناامنۍ پېښې کيږي.
د 13م اګست په شپه ناوخته د پاکستان د پوځ سرلښکر جنرل عاصم منیر په کاکول کې د پوځي پرېډ دستورې ته په وينا کې ويلي وو، په خېبر پښتونخوا صوبه کې یو وارې بیا د ترهګرۍ فتنې سر راپورته کړی او د ترهګرۍ چقولو یا ځپلو لپاره د پاکستان پوځ او قانون په ځای کوونکې ادارې په مبارزه بوختې دي.