پولیس وایي د خېبر پښتونخوا په صوابۍ سیمه کې د تحریک انصاف ګوند د یو وتلي مشر اؤ د قامي اسمبلۍ د غړي شهرام خان ترکئ په حجره کې د یو وسله وال تن په ډزو د شهرام خان د حجرې ساتونکی وژل شوی اؤ د پولیسو سره په مقابله کې بیا برید کوونکی هم وژل شوی دی.
د صوابۍ د کالو خان پولیس ټاڼې یو چارواکي اقرار باچا وي او ای ډیوه ته ددې پېښې پخلی کړی اؤ ویلي یې دي چې دا پېښه د شورو یا خالي په ورځ رامنځته شوې ده.
د اقرار باچا د وینا له مخې ، یو وسله وال تن غوښتل د شهرام خان حجرې ته ننوځي خو وایي کله چې د حجرې ساتونکي هغه له دننه تګ منعې کولو نو هغه په ساتونکي ناتاره ډزې کړي اؤ هغه یې وژلی دی.
د وژل شوي ساتونکي پېژندګلو د ګل نواس په نوم شوې ده چې د پېښور د بډه بېرې سیمې اوسیدونکی ؤ.
پولیس چارواکی اقرار باچا وایي د پېښې نه وروسته برید کوونکي د تېښتې هڅه کوله اؤ پولیسو د هغه تعقیب کولو چې په دغه مهال وسله وال تن په پولیسو هم ډزې کړي اؤ کله چې پولیسو په هغه ځوابي ډزې وکړې نو په دغو ډزو کې وسله وال هم وژل شوی دی.
د پولیس وینا ده چې د پولیسو په ډزو کې وسله وال تن د سیمې صوابۍ اوسیدونکی دی.
پولیس وایي دا د ترهګرۍ کومه پېښه نه وه بلکې یو تن غوښتل چې د وسلې سره د شهرام خان حجرې ته ننوځي .
پولیس زیاتوي چې د پېښې ایف آي ار یې درج کړی خو په هغې کې د ترهګرۍ دفعه نه ده شامل کړل شوې.
وي او ای ډیوه د پېښې په اړه دشهرام خان ترکرئ د نظر اخستو په غرض هغه سره د واټسف له لارې د تماس نیولو هڅه وکړه اؤ هغه نه یې د یو غږییز پېغام له لارې هم نظر وغوښتو خو شهرام خان ترکئ لا د ډيوه پوښتنې ته څه ځواب نه دی ویلی.