په پاکستان کې د پولیو خلاف د روان کمپین په مهال د خېبر پښتونخوا څخه د پولیو یوه بله پېښه مخې ته راغلې ده چې دې سره پاکستان کې د روان کال په مهال د پولیو د رامنځته شوؤ پېښو شمېره 42 ته رسېدلې ده.
په اسلام اباد کې د صحت د قامي ادارې د پولیو د مخنیوي ریجنل ریفرنس لیبارټرۍ د پولیو دا تازه پېښه تاييد کړې اؤ ویلي یې دي چې دا پېښه د خېبر پښتونخوا د نوښار سیمې نه مخې ته راغلې ده.
پاکستان کې د پوليو مخنيوي د پروګرام د پېښور څانګې خبر پاڼه کې ويلي، د نوښار په ګنډهیري سیمه کې د 29 میاشتو یوې ماشومې ته پولیو وایرس ورپورې کېدو پخلی شوی دی.
دا پېښه په داسې حال کې مخې ته راغلې چې د 28م اکتوبر نه پاکستان کې د پولیو په ضد کمپین پېل شوی اؤ ټاکل شوې چې دا کمپين به تر دریم نومبر روان وي.
تېره ورځ د خېبر پښتونخوا د بره اورکزۍ په ډبوري بادان کلي کې د پولیو په یوه ډله برید هم شوی ؤ چې پکې د پولیو ډلې په حفاظت مامور دوه پولیس عسکر وژل شوي وؤ اؤ پولیسو دعوه کړې وه چې په ځوابي ډزو کې درې برید کوونکي هم وژل شوي دي.
راپورونه ښيي چې سږ کال په ټول پاکستان کې د پوليو 42 پېښې ريورټ شوې، چې پکې 21 په بلوچستان، 12 په سند، 7 په خیبر پښتونخوا یوه په پنجاب او یوه په اسلام آباد کې مخې ته راغلې ده .
د صحت نړیواله اداره (ډبلیو ایچ او ) د پوليو پېښو زیاتېدو په اړه ژوره اندېښنه ښودلې او خبرداری یې ورکړی چې له پاکستان څخه پوليو وايرس نورو هېوادونو ته د انتقالېدو فوري خطر شته.
د دوی په وينا، د افغان کډوالو د زیات شمېر راستنېدو او په پاکستان کې د پوليو ټيمونو ته د امنیت ګواښونو له امله د دې ناروغۍ مخنیوی له لویو ستونزو سره مخ دی.
په پاکستان کې د پوليو د خاتمې لپاره د ایمرجنسي آپریشن سينټر له خوا په پيل شوي کمپین کې 81 زره پوليو ټیمونه کار کوي، چې د هغوی د خونديتوب لپاره 19 زره امنيتي اهلکاران ګمارل شوي دي.
په پاکستان کې 1994 کال راهیسې د پوليو مخنيوي پروګرام روان دی، او دعوه کوي چې د دې پروګرام له امله په هېواد کې د پوليو پېښو کچه 99 سلنه کمه شوې. خو بيا هم، له افغانستان وروسته پاکستان په نړۍ کې يوازينی هغه هېواد دی چې لا هم پکې د پوليو پېښې په دوامداره توګه رپورټ کیږي.
د افغانستان او پاکستان ترمنځ سرحدي سیمو کې اوس هم ځای پځای د پولیو وېکسین نه انکار موجود دی، او دې خبرې د پولیو ضد هڅې زیانمنې کړې دي.
د سرحدي کرښې دواړو غاړو ته تندلاري د وېکسین په ضد هلې ځلې کوي او د وېکسین په کارمندانو او د هغو په محافظانو یې د تشدد نه ډکی حملې کړې دي.
په پاکستان او افغانستان کې په دې لړ کې په سلهاوو تنان وژل شوي دي.